പാകിസ്ഥാനിൽ സ്കൂൾ വാനിന് നേരെ വെടിവെയ്‌പ്പ് ; 2 കുട്ടികൾ കൊല്ലപ്പെട്ടു ; 7 പേർക്ക് പരിക്ക്

ഇസ്ലാമാബാദ് ; പാകിസ്ഥാനിൽ സ്കൂൾ വാനിന് നേരെയുണ്ടായ വെടിവെയ്‌പ്പിൽ 2 കുട്ടികൾക്ക് ദാരുണാന്ത്യം. 7 പേർക്ക് പരിക്കേറ്റു. പാകിസ്ഥാനിലെ പഞ്ചാബ് പ്രവിശ്യയിൽ ലാഹോറിൽ നിന്ന് 400 കിലോമീറ്റർ അകലെ അറ്റോക്ക് ജില്ലയിലെ ധേരി കോട് മേഖലയിലാണ് സംഭവം. കുട്ടികളെ സ്‌കൂളിലേക്ക് കൊണ്ടു വിടാൻ പോകുകയായിരുന്ന സ്‌കൂൾ വാന് നേരെ അജ്ഞാതർ വെടിയുതിർക്കുകയായിരുന്നുവെന്ന് പോലീസ് പറഞ്ഞു.

ഏഴ് കുട്ടികൾക്ക് ആക്രമണത്തിൽ പരിക്കേറ്റതായി പോലീസ് പറഞ്ഞു. എല്ലാവരേയും ഉടൻ ആശുപത്രിയിലേയ്‌ക്ക് മാറ്റി. രണ്ട് കുട്ടികളുടെ നില ഗുരുതരമാണെന്നാണ് സൂചന . 5 നും 10 നും പ്രായമുള്ള കുട്ടികൾക്കാണ് പരിക്കേറ്റത്. ഡ്രൈവർക്കും സാരമായ പരിക്കുണ്ട്. സിസിടിവി ദൃശ്യങ്ങളുടെ സഹായത്തോടെ അക്രമികളെ പിടികൂടാൻ പൊലീസ് സംഘത്തെ രൂപീകരിച്ചതായി ആഭ്യന്തര മന്ത്രി മൊഹ്‌സിൻ നഖ്‌വിയും പാകിസ്ഥാൻ പഞ്ചാബ് മുഖ്യമന്ത്രി മറിയം നവാസും പറഞ്ഞു.