തിരുവനന്തപുരം: മലപ്പുറം ജില്ലാ പോലീസ് മേധാവി എസ്. ശശിധരനെ പൊതുവേദിയില് അധിക്ഷേപിച്ച നിലമ്പൂര് എംഎല്എ പി.വി. അന്വറിനെതിരേ പ്രമേയം പാസാക്കി ഐപിഎസ് അസോസിയേഷന്. പി.വി. അന്വര് നടത്തിയ പ്രസ്താവന പിന്വലിച്ച് മാപ്പ് പറയണമെന്നാണ് ഐപിഎസ് അസോസിയേഷന്റെ പ്രമേയത്തിലെ ആവശ്യം. എംഎല്എക്കെതിരെ മുഖ്യമന്ത്രിക്ക് പരാതി നല്കാനാണ് ഐപിഎസ് അസോസിയേഷന്റെ തീരുമാനം.
അന്വറിന്റെ പരാമര്ശം അടിസ്ഥാനരഹിതമാണെന്ന് മാത്രമല്ല, അത്യന്തം അപകടകരമാണെന്നും ഐപിഎസ് അസോസിയേഷന് ചൂണ്ടിക്കാട്ടി. ഐപിഎസ് ഉദ്യോഗസ്ഥരെ അന്വര് പൊതുവില് അപകീര്ത്തിപ്പെടുത്താനാണ് തീരുമാനിച്ചതെന്നും നിയമരാഹിത്യത്തിന്റെ ഭീതിതമായ സ്ഥിതിയാണ് എംഎല്എ സൃഷ്ടിക്കാന് ശ്രമിക്കുന്നതെന്നും പ്രസ്താവനയില് പറയുന്നു. കഴിഞ്ഞദിവസം മലപ്പുറം എസ്പിയെ എംഎല്എ പൊതുവേദിയില് അധിക്ഷേപിച്ചത് വിവാദമായതിനു പിന്നാലെയാണ് അന്വറിനെതിരേ ഐപിഎസ് അസോസിയേഷന് പ്രമേയം പാസാക്കിയത്.
അദ്ദേഹം ജില്ലാ പോലീസ് മേധാവിയെ ഫാസിസ്റ്റായി മുദ്രകുത്തി, സാഹചര്യത്തെ ബംഗ്ലാദേശിനോട് ഉപമിച്ചു. അപമാനകരമായ പെരുമാറ്റമാണ് ഉണ്ടായത്’, ഐപിഎസ് അസോസിയേഷന് ചൂണ്ടിക്കാട്ടി. നിയമനടപടികള് അവഗണിച്ച് പലവട്ടം ഔദ്യോഗിക കാര്യങ്ങളില് ജില്ലാ പോലീസ് മേധാവിയെ സ്വാധീനിക്കാന് ശ്രമിച്ചതായി എംഎല്എ പരസ്യമായി സമ്മതിച്ചിരിക്കുകയാണ്. ഇത് നിയമലംഘനത്തിന്റെ അപകടകരമായ പ്രവണതയാണെന്ന് അസോസിയേഷന് ചൂണ്ടിക്കാട്ടി.
മലപ്പുറത്ത് നടന്ന പോലീസ് അസോസിയേഷന് ജില്ലാ സമ്മേളന വേദിയില് വച്ചായിരുന്നു മലപ്പുറം എസ്പിയെ അന്വര് അധിക്ഷേപിച്ചത്. തന്റെ പാര്ക്കിലെ ഒന്പതു ലക്ഷം രൂപ വിലയുള്ള റോപ് മോഷണം പോയി എട്ടു മാസമായിട്ടും പ്രതിയെ പിടിച്ചില്ലെന്നു പറഞ്ഞായിരുന്നു അധിക്ഷേപ പരാമര്ശം നടത്തിയത്. മലപ്പുറത്ത് നടന്ന ജില്ലാ പോലീസ് അസോസിയേഷന് സമ്മേളന വേദിയിലായിരുന്നു ഭരണകക്ഷി എംഎല്എയുടെ അധിക്ഷേപം. പിന്നാലെ മുഖ്യപ്രഭാഷകനായി എത്തിയ എസ്പി എസ്. ശശിധരന്, താന് അല്പം തിരക്കിലാണെന്നും പ്രസംഗത്തിനു പറ്റിയ മാനസികാവസ്ഥയില് അല്ലെന്നും പറഞ്ഞ് ചുരുങ്ങിയ വാക്കുകളില് പ്രസംഗം അവസാനിപ്പിച്ചു വേദിവിട്ടു.
ചടങ്ങില് എസ്പി എത്താന് വൈകിയതിനാല് കാത്തിരിക്കേണ്ടി വന്നതും തന്റെ പാര്ക്കിലെ റോപ് മോഷണം പോയതില് പ്രതിയെ പിടികൂടാത്തതിലെ പ്രതിഷേധവും എംഎല്എ പ്രസംഗത്തില് ചൂണ്ടിക്കാട്ടി. സര്ക്കാരിനും മുഖ്യമന്ത്രിക്കും എതിരേ ജനങ്ങളുടെ മനോവികാരമുണ്ടാക്കാന് പോലീസില് ചിലര് ശ്രമിക്കുന്നുണ്ടെന്നും എംഎല്എ ആരോപിച്ചിരുന്നു.
