തിരുവനന്തപുരം: ശ്രീനാരായണഗുരുദേവന്റെ 170-ാമത് മഹാജയന്തി ആഘോഷം ചൊവ്വാഴ്ച.ശിവഗിരി മഠത്തില്‍ രാവിലെ 9.30 ന് നടക്കുന്ന ജയന്തി സമ്മേളനം കേന്ദ്രസഹമന്ത്രി സുരേഷ് ഗോപി ഉദ്ഘാടനം ചെയ്യും. സ്വാമി സച്ചിദാനന്ദ അദ്ധ്യക്ഷത വഹിക്കും.
വയനാട് ദുരന്തത്തിന്റെ പശ്ചാത്തലത്തില്‍ ആഘോഷങ്ങള്‍ ഒഴിവാക്കും ശിവഗിരി മഠത്തിലും ചെമ്പഴന്തി ഗുരുകുലത്തിലും.പ്രാര്‍ത്ഥനാനിര്‍ഭരമായാണ് ഗുരുദേവജയന്തി പരിപാടികള്‍ സംഘടിപ്പിച്ചിട്ടുള്ളത്. ഗുരുദേവനാമം ഉരുവിട്ടുള്ള നാമസങ്കീര്‍ത്തനയാത്ര ഗുരുമന്ദിരങ്ങളുടെയും ഗുരുദേവ പ്രസ്ഥാനങ്ങളുടെയും നേതൃത്വത്തില്‍ സംഘടിപ്പിക്കും.
ചെമ്പഴന്തി ശ്രീനാരായണഗുരുകുലത്തില്‍ വൈകിട്ട് 6.30 ന് നടക്കുന്ന ഗുരുജയന്തി മഹാസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ശ്രീനാരായണ ധര്‍മ്മസംഘം ട്രസ്റ്ര് പ്രസിഡന്റ് സ്വാമി സച്ചിദാനന്ദ ജയന്തി സന്ദേശം നല്‍കും. സ്വാമി സൂക്ഷ്മാനന്ദ അനുഗ്രഹ പ്രഭാഷണം നടത്തും. ശ്രീനാരായണ ധര്‍മ്മസംഘം ട്രസ്റ്ര് ജനറല്‍ സെക്രട്ടറി സ്വാമി ശുഭാംഗാനന്ദ സ്വാഗതം പറയും.
ചിങ്ങമാസത്തില്‍ തിരുവോണവും അവിട്ടവും കഴിഞ്ഞുള്ള ചതയ ദിനത്തിലാണ് സാധാരണ ഗുരുദേവ ജയന്തി.എന്നാല്‍ ഇക്കുറി ഓണം കഴിഞ്ഞുള്ള ചതയദിനം കന്നിമാസം ഒന്നാം തീയതി ആയതിനാലാണ് ജയന്തി ആഘോഷം നേരത്തെ വന്നത്.
പ്രതികരിക്കാൻ ഇവിടെ എഴുതുക: