ന്യൂദൽഹി: ലണ്ടനിലെ ഒരു ഹോട്ടലിൽ ഈ ആഴ്ച ആദ്യം എയർ ഇന്ത്യയുടെ വനിതാ ക്യാബിൻ ക്രൂ അംഗത്തെ ഒരാൾ ലൈംഗികമായി ആക്രമിച്ചതായി റിപ്പോർട്ട്. ലണ്ടൻ ഹീത്രൂ വിമാനത്താവളത്തിന് സമീപമുള്ള ഒരു നക്ഷത്ര ഹോട്ടലിലാണ് സംഭവം.
വിഷയം ലണ്ടൻ പോലീസുമായി എയർലൈൻ ബന്ധപ്പെട്ടുകൊണ്ടിരിക്കുകയാണെന്ന് അധികൃതർ അറിയിച്ചു. ഒരു പ്രമുഖ അന്താരാഷ്ട്ര ശൃംഖലയുടെ കീഴിലുള്ള ഹോട്ടലിൽ നടന്ന അക്രമം ഞങ്ങളുടെ ക്രൂ അംഗത്തെ ബാധിച്ചതിൽ അതിയായ വേദനയുണ്ടെന്ന് എയർ ഇന്ത്യ വക്താവ് പ്രസ്താവനയിൽ പറഞ്ഞു.
വനിതാ ക്യാബിൻ ക്രൂ താമസിച്ചിരുന്ന ഹോട്ടലിലെ മുറിയിലേക്ക് ഒരാൾ അതിക്രമിച്ച് കയറി ആക്രമിക്കുകയായിരുന്നുവെന്ന് അധികൃതർ പറഞ്ഞു. ജീവനക്കാരി നിലവിളിച്ചതോടെ സമീപത്തുണ്ടായിരുന്ന മറ്റുള്ളവർ എത്തി അവരെ രക്ഷപ്പെടുത്തുകയും അക്രമിയെ പിടികൂടുകയും ചെയ്തു.
ഹോട്ടലിൽ വച്ച് ക്യാബിൻ ക്രൂ ലൈംഗികാതിക്രമത്തിന് ഇരയായതായി ഒരു സ്രോതസ്സ് പറഞ്ഞു. ക്യാബിൻ ക്രൂ അംഗം ഇന്ത്യയിലേക്ക് മടങ്ങിയെന്നും കൗൺസിലിങ്ങിന് വിധേയയായെന്നും വൃത്തങ്ങൾ കൂട്ടിച്ചേർത്തു. അതേ സമയം എയർ ഇന്ത്യ ലോക്കൽ പോലീസുമായി ചേർന്ന് നിയമത്തിന്റെ പൂർണ്ണമായ സഹായം ജീവനക്കാരിക്ക് ഉറപ്പ് വരുത്തുന്നുണ്ട്.
കൂടാതെ ഇത്തരം സംഭവങ്ങൾ ആവർത്തിക്കാതിരിക്കാൻ ഹോട്ടൽ മാനേജ്മെൻ്റുമായി സഹകരിച്ച് പ്രവർത്തിക്കുന്നു. അക്രമത്തിന് ഇരയായ യുവതിയുടെ സ്വകാര്യത മാനിക്കണമെന്ന് തങ്ങൾ അഭ്യർത്ഥിക്കുന്നുവെന്നും എയർലൈൻ പറഞ്ഞു.
