തിരുവനന്തപുരം: 2023ലെ കേരള സംസ്ഥാന ചലച്ചിത്ര അവാര്ഡിന്റെ പരിഗണനയ്ക്കായി ഇത്തവണ സമര്പ്പിക്കപ്പെട്ട കുട്ടികളുടെ ചിത്രത്തിന് അവാര്ഡില്ല. കുട്ടികളുടെ ചിത്രങ്ങളുടെ വിഭാഗത്തില് നാലു ചിത്രങ്ങളാണ് സമര്പ്പിക്കപ്പെട്ടിരുന്നത്. ഇവയില് ഒരു ചിത്രം കുട്ടികളുടെ വിദ്യാഭ്യാസ പരിപാടിയായതിനാല് ഫീച്ചര് ഫിലിമായി പരിഗണിക്കാന് കഴിയില്ലെന്ന് ജൂറി വിലയിരുത്തി. മറ്റു മൂന്നു ചിത്രങ്ങളും അവാര്ഡിന് പരിഗണിക്കാന് തക്കനിലവാരമുള്ളവയായിരുന്നില്ലെന്ന് ജൂറി വിലയിരുത്തി. ഇതോടെ ഈ വിഭാഗത്തില് പുരസ്കാരം പ്രഖ്യാപിച്ചിട്ടില്ല. 160 ചിത്രങ്ങളാണ് പുരസ്കാരത്തിനായി എത്തിയത്. ചലച്ചിത്ര അവാര്ഡിന്റെ ചരിത്രത്തിലെ ഏറ്റവും കൂടുതല് ചിത്രങ്ങള് വന്നത് ഇത്തവണയാണ്. ഇതില് നിന്നും പ്രാഥമിക ജൂറി രണ്ട് സബ് കമ്മിറ്റികളായി തിരിഞ്ഞ് 80 വീതം സിനിമകള് കാണുകയും 35 സിനിമകള് ഷോര്ട്ട് ലിസ്റ്റ് ചെയ്യുകയും ചെയ്തു.
പ്രാഥമിക ജൂറി തെരഞ്ഞെടുക്കാത്ത മൂന്നു ചിത്രങ്ങള് അന്തിമ ജൂറി തിരിച്ചുവിളിച്ചു കാണുകയും ചെയ്തിരുന്നു ഇത്തവണ. അങ്ങനെ ആകെ 38 സിനിമകളാണ് അന്തിമ ജൂറി അവാര്ഡ് നിര്ണയത്തിനായി സസൂക്ഷ്മം വിലയിരുത്തിയത്. അന്തിമപട്ടികയിലെ 38 ചിത്രങ്ങളില് 22 ചിത്രങ്ങളും നവാഗത സംവിധായകരുടേതായിരുന്നുവെന്നത് മലയാളസിനിമയുടെ ഭാവിയെ സംബന്ധിച്ച് ആശാവഹമായ കാര്യമാണെന്നാണ് ജൂറി വിലയിരുത്തിയത്.
പുരസ്കാരങ്ങള് ലഭിച്ച മലയാള ചിത്രങ്ങള് കേരളത്തിന് പുറത്ത് പ്രദര്ശിപ്പിക്കാനുള്ള അവസരങ്ങള് ഒരുക്കണമെന്ന് ജൂറി സര്ക്കാറിനോട് നിര്ദേശിച്ചിട്ടുണ്ട്. 2023ലെ സംസ്ഥാന അവാര്ഡിനായി പരിഗണിക്കപ്പെട്ടത് 160 സിനിമകളാണ്. പ്രാഥമിക ജൂറി രണ്ട് സബ് കമ്മിറ്റികളായി തിരിഞ്ഞ് 80 സിനിമകള് കാണുകയും 35 സിനിമകള് ഷോര്ട് ലിസ്റ്റ് ചെയ്യുകയും ചെയ്തു. കുട്ടികളുടെ സിനിമകളില് നാല് സിനിമകള് പരിഗണിക്കപ്പെട്ടു. അങ്ങനെ 38 സിനിമകള് അവസാന റൗണ്ടില് എത്തി. മന്ത്രി സജി ചെറിയാനാണ് പുരസ്കാര പ്രഖ്യാപനം നടത്തിയത്. സംവിധായകന് പ്രിയനന്ദനും ഛായാഗ്രാഹകന് അഴകപ്പനുമാണ് പ്രാഥമിക ജൂറി അധ്യക്ഷന്മാര്. സംവിധായകന് ലിജോ ജോസ് പെല്ലിശ്ശേരി, എഴുത്തുകാരന് എന്.എസ്. മാധവന് എന്നിവരായിരുന്നു ജൂറി അംഗങ്ങള്.
