കല്‍പ്പറ്റ: കേരളത്തിലെ ക്വാറികളില്‍ നല്ലൊരു ശതമാനവും അനധികൃതമാണെന്നും ക്വാറികള്‍ മുഴുവനും സര്‍ക്കാര്‍ ഏറ്റെടുക്കണമെന്നും പരിസ്ഥിതി പ്രവര്‍ത്തകന്‍ മാധവ് ഗാഡ്ഗില്‍. എത്ര ക്വാറികള്‍ പ്രവര്‍ത്തിക്കുന്നുവെന്നതിന് സര്‍ക്കാരിന്‌റെ കൈയില്‍ കൃത്യമായ കണക്കില്ല. പ്രകൃതി സംരക്ഷണ സമിതി കല്‍പറ്റയില്‍ നടത്തിയ പരിസ്ഥിതി സംരക്ഷണ സമ്മേളനത്തില്‍ വീഡിയോ സന്ദേശത്തിലൂടെയാണ് മാധവ് ഗാഡ്ദില്‍ ഇക്കാര്യം പറഞ്ഞത്.
കേരളത്തിലെ ക്വാറികളുടെ പ്രവര്‍ത്തനത്തെയും പരിസ്ഥിതി ചൂഷണത്തെയും വിമര്‍ശിച്ച മാധവ് ഗാഡ്ഗില്‍ വയനാട്ടിലെ ദുരന്ത ബാധിതര്‍ക്ക് 25,000 രൂപ നല്‍കുമെന്നും അറിയിച്ചു. വയനാട്ടിലെ ഉരുള്‍പൊട്ടല്‍ ദുരന്ത ബാധിതരുടെ പുനരധിവാസം കൃത്യമായി നടപ്പാക്കേണ്ടതുണ്ട്. മുന്‍പ് ഉണ്ടായ ഇത്തരം പ്രകൃതിദുരന്തങ്ങളില്‍ പുനരധിവാസം കൃത്യമായി നടന്നിട്ടില്ല. ഇതില്‍ മാറ്റമുണ്ടാകണം.
കേരളത്തിലെ ക്വാറികളുടെ നടത്തിപ്പ് സര്‍ക്കാര്‍ ഏറ്റെടുത്ത് കുടുംബശ്രീ സംഘങ്ങളെ എല്‍പ്പിക്കണം. വലിയ റിസോര്‍ട്ടുകള്‍ പ്രകൃതിക്ക് ആഘാതം സൃഷ്ടിക്കുകയാണെന്നും അദ്‌ദേഹം പറഞ്ഞു.
പ്രതികരിക്കാൻ ഇവിടെ എഴുതുക: