തിരുവനന്തപുരം: ശനിയാഴ്ചകള് പ്രവൃത്തിദിനമാക്കിയുള്ള തീരുമാനം ഹൈകോടതി ഉത്തരവിനെ തുടര്ന്ന് മരവിപ്പിച്ച് പൊതുവിദ്യാഭ്യാസ ഡയറക്ടറുടെ സര്ക്കുലര്. കോടതി വിധിയുടെ അടിസ്ഥാനത്തില് സര്ക്കാറില്നിന്ന് അന്തിമ തീരുമാനം ഉണ്ടാകുന്നതുവരെ ശനിയാഴ്ച സ്കൂളുകള്ക്ക് പ്രവൃത്തിദിനമായിരിക്കില്ലെന്ന് സര്ക്കുലറില് വ്യക്തമാക്കി.
അധ്യാപക സംഘടനകളുമായും, രക്ഷിതാക്കളുമായും ക്യു.ഐ.പി യോഗത്തിലുമടക്കം ചര്ച്ചകള് നടത്തിയതിനു ശേഷമായിരിക്കും ഇനി തീരുമാനമുണ്ടാവുക.
കേരളത്തിലെ സര്ക്കാര്, എയ്ഡഡ് സ്കൂളുകളില് ശനിയാഴ്ച പ്രവൃത്തി ദിവസമാക്കിയ ഉത്തരവ് ഈ മാസം ഒന്നിനാണ് ഹൈക്കോടതി റദ്ദാക്കിയത്. അധ്യാപക സംഘടനകളും വിദ്യാര്ഥികളുമടക്കമുള്ളവര് നല്കിയ ഹര്ജി പരിഗണിച്ചായിരുന്നു കോടതി വിധി.
25 ശനിയാഴ്ചകള് ഉള്പ്പെടെ 220 അധ്യയന ദിനം തികക്കുന്ന രീതിയിലായിരുന്നു പുതിയ കലണ്ടര്. കഴിഞ്ഞ വര്ഷത്തേക്കാള് 16 ശനിയാഴ്ചകളാണ് പുതിയ കലണ്ടറില് പ്രവര്ത്തി ദിനം. ഇത് ദേശീയ വിദ്യാഭ്യാസ അവകാശ നിയമത്തിന് എതിരാണെന്നാണ് അധ്യാപക സംഘടനകള് ചൂണ്ടിക്കാട്ടിയത്.
