തിരുവനന്തപുരം: മുഖ്യമന്ത്രിയുടെ ദുരിതാശ്വാസനിധിയുടെ വിനിയോഗം സംബന്ധിച്ചുള്ള ഹര്ജി മൂന്നംഗബെഞ്ചിന് വിട്ട ലോകായുക്തഡിവിഷന് ബെഞ്ചിന്റെ ഉത്തരവ് റദ്ദാക്കണമെന്നും പുനര്വിചാരണ നടത്തണമെന്നും ആവശ്യപ്പെട്ടുള്ള ഹര്ജിയില് സപ്തം. 24 ന് ഹൈക്കോടതി വാദം കേള്ക്കും. ജസ്റ്റിസ്എ. മുഹമ്മദ് മുസ്താഖ്, ജസ്റ്റിസ് എസ്. മനു എന്നിവരടങ്ങുന്ന ഡിവിഷന് ബെഞ്ചാണ് ഉത്തരവിട്ടത്. മുഖ്യമന്ത്രി പിണറായി വിജയനെയും, ഒന്നാം പിണറായി സര്ക്കാരിലെ 17 മന്ത്രിമാരെയും ചീഫ് സെക്രട്ടറിയേയും എതിര്കക്ഷികളാക്കി ലോകായുക്തയിലെ പരാതിക്കാരനായ ആര്.എസ്. ശശികുമാറാണ് ഹൈക്കോടതിയെ സമീപിച്ചത്.
ജനുവരി 8 നാണ് മുഖ്യമന്ത്രി ഉള്പ്പെടെ 17 മുന് മന്ത്രിമാര്ക്കും ചീഫ് സെക്രട്ടറിക്കും നോട്ടീസ് അയക്കാന് കോടതി ഉത്തരവിട്ടത്. എന്നാല് മന്ത്രിമാരായിരുന്ന മാത്യു ടി. തോമസ്, കെ. രാജു, ടി. പി. രാമകൃഷ്ണന്, ഇപ്പോഴത്തെ മന്ത്രിയായ കടന്നപ്പള്ളി രാമചന്ദ്രന് എന്നിവര് നോട്ടീസ് കൈപ്പറ്റിയില്ല. തുടര്ന്ന് ഹര്ജിയില് വാദം കേള്ക്കുന്നത് നീട്ടിവച്ചിരുന്നു. എന്നാല് കോടതിയുടെ പ്രത്യേക നിര്ദേശപ്രകാരം ഇവര് നാലു പേരും നോട്ടീസ് കൈപ്പറ്റിയതായി കണക്കാക്കി വാദം കേള്ക്കാന് ഇന്നലെ ഡിവിഷന് ബെഞ്ച് ഉത്തരവിടുകയായിരുന്നു. എന്സിപി നേതാവായിരുന്ന അന്തരിച്ച ഉഴവൂര് വിജയന്റെ കുടുംബത്തിന് 25 ലക്ഷവും, അന്തരിച്ച ചെങ്ങന്നൂര് എംഎല്എ രാമചന്ദ്രന് നായരുടെ കുടുംബത്തിന് എട്ടര ലക്ഷവും സിപിഎം സെക്രട്ടറിയായിരുന്ന കോടിയേരി ബാലകൃഷ്ണന്റെ പൈലറ്റ് വാഹനം അപകടത്തില്പെട്ട് മരിച്ച സിവില് പോലീസ് ഓഫീസറുടെ കുടുംബത്തിന് 20 ലക്ഷം രൂപയും മുഖ്യമന്ത്രിയുടെ ദുരിതാശ്വാസനിധിയില് നിന്ന് അനുവദിച്ചതാണ് പരാതിക്കാധാരം. ഹര്ജിക്കാരനു വേണ്ടി മുതിര്ന്ന അഭിഭാഷകന് ജോര്ജ് പൂന്തോട്ടം ഹാജരായി.
