തൃശൂര്: തൃശൂര്പൂരം നടത്തിപ്പുമായി ബന്ധപ്പെട്ട് പ്രത്യേക യോഗം വിളിച്ച് കേന്ദ്രമന്ത്രി സുരേഷ് ഗോപി. തൃശൂര് കളക്ടറേറ്റില് 14ാം തീയതി രാവിലെ 10 മണിക്കാണ് യോഗം ചേരുന്നത്. കളക്ടര്, മന്ത്രിമാര്, പാറമേക്കാവ്, തിരുവമ്പാടി ദേവസ്വം ഭാരവാഹികള് തുടങ്ങിയവര് യോഗത്തില് പങ്കെടുക്കും.
തൃശൂര് പൂരത്തില് വെടിക്കെട്ട് നടത്തുന്നതുമായി ബന്ധപ്പെട്ട കാര്യങ്ങളിലാണ് ചര്ച്ച സംഘടിപ്പിക്കുന്നത്. കഴിഞ്ഞ തവണത്തെ പ്രശ്നങ്ങള്ക്ക് പരിഹാരം കാണാനും ജനങ്ങളോട് കൂടുതല് സഹകരിച്ച് പൂരം നടത്താനുമുള്ള തീരുമാനം യോഗത്തില് ഉണ്ടായേക്കും. സുരേഷ് ഗോപി നേരിട്ട് പങ്കെടുക്കുന്ന യോഗത്തില് കേന്ദ്രസര്ക്കാരിന്റെ ഭാഗത്ത് നിന്നുള്ള ഉദ്യോഗസ്ഥരും പങ്കെടുക്കും.
വെടിക്കെട്ട് നിര്ത്തിവയ്ക്കണമെന്ന സമീപനമായിരുന്നു പൊലീസിന്റെ ഭാഗത്ത് നിന്നും കഴിഞ്ഞ തവണയുണ്ടായത്. ഇതേത്തുടര്ന്ന് രാത്രിയിലെ വെടിക്കെട്ട് തിരുവമ്പാടി ദേവസ്വം നിര്ത്തി വയ്ക്കേണ്ട സാഹചര്യമുണ്ടായിരുന്നു. തുടര്ന്ന് രാത്രി നടത്തേണ്ട വെടിക്കെട്ട് രാവിലെയാണ് ദേവസ്വം നടത്തിയത്. ഇത്തരം പ്രശ്നങ്ങള് ഒഴിവാക്കാനാണ് നേരത്തെ യോഗം ചേര്ന്ന് പൂരം നടത്തിപ്പുമായി ബന്ധപ്പെട്ട കാര്യങ്ങള് ചര്ച്ച ചെയ്യുന്നത്.
