കോഴിക്കോട്: കക്കാടംപൊയിലില് പിവി അന്വര് എംഎല്എ കാട്ടരുവിയുടെ ഒഴുക്കിന് തടസമുണ്ടാക്കി നിര്മ്മിച്ച നിര്മ്മിതികള് ഒരു മാസത്തിനകം പൊളിച്ച് നീക്കണമെന്ന് ജില്ലാ കളക്ടറുടെ ഉത്തരവ്. ഹൈക്കോടതി നിര്ദേശത്തെ തുടര്ന്നാണ് നടപടി.
രണ്ട് തവണയായി നടത്തിയ തെളിവെടുപ്പിന് ശേഷമാണ് കളക്ടര് ഉത്തരവ് പുറപ്പെടുവിച്ചത്.പ്രകൃതിദത്തമായ നീര്ച്ചാലുകള്ക്ക് കുറുകെയുളള നിര്മ്മാണ പ്രവര്ത്തികള് കാട്ടരുവിയുടെ സ്വതന്ത്രമായ ഒഴുക്കിന് തടസമുണ്ടാക്കി. കാലവര്ഷ വേളയില് ഇത് ദുരന്തത്തിന് വഴിവയ്ക്കുമെന്ന് കാട്ടിയാണ് പൊളിച്ചു നീക്കാനുള്ള കളക്ടറുടെ ഉത്തരവ്. ഉടമ പൊളിച്ചില്ലെങ്കില് കൂടരഞ്ഞി പഞ്ചായത്ത് സെക്രട്ടറി പൊളിച്ച് നീക്കണമെന്നും ചിലവ് ഉടമസ്ഥരില് നിന്നും ഈടാക്കണമെന്നും ഉത്തരവിലുണ്ട്.
അരുവിയുടെ ഒഴുക്ക് തടഞ്ഞുളള തടയണകള് പൊളിച്ച് നീക്കണമെന്ന് ഹൈക്കോടതി നേരത്തെ ഉത്തരവിട്ടിരുന്നു. പൊളിച്ച് നീക്കലിന്റെ മറവില് അരുവി തന്നെ നികത്തിയെന്ന് കാണിച്ച് ഗ്രീന് മൂവ്മെന്റ് എന്ന സംഘടനയാണ് ഹൈക്കോടതിയിലെത്തിയത്. കളക്ടര് ബന്ധപ്പെട്ട കക്ഷികളുമായി ചേര്ന്ന് തെളിവെടുപ്പ് നടത്തി നടപടി സ്വീകരിക്കണമെന്നായിരുന്നു കോടതി നിര്ദേശം.
രണ്ട് തവണ തെളിവെടുപ്പ് നടത്തിയെങ്കിലും റിസോര്ട്ട് പ്രതിനിധികള് പങ്കെടുത്തിരുന്നില്ല. അനുമതിയില്ലാതെയാണ് നിര്മ്മാണ പ്രവര്ത്തികളെന്ന് കൂടരഞ്ഞി വില്ലേജ് ഓഫീസറും ഗ്രാമപഞ്ചായത്ത് സെക്രട്ടറിയും റിപ്പോര്ട്ട് നല്കിയിരുന്നു.
നിലമ്പൂരില് നിന്ന് സി പി എം സ്വതന്ത്രനായി മത്സരിച്ച് വിജയിച്ച ആളാണ് പി വി അന്വര്.
