തിരുവനന്തപുരം: സംസ്ഥാനത്ത് കോഴിവിലയില്‍ കുത്തനെ ഇടിവ്. പ്രാദേശിക ഉത്പാദനം കൂടിയതും തമിഴ്നാട്ടില്‍നിന്നുള്ള കോഴിയുടെ വരവ് ഉയര്‍ന്നതുമാണ് വില കുറയുവാന്‍ കാരണമെന്ന് വ്യാപാരികള്‍ പറഞ്ഞു. രണ്ടാഴ്ച മുമ്പ് 160 ആയിരുന്ന കോഴി കിലോയ്‌ക്ക് 100 രൂപ മുതല്‍ 120 രൂപ വരെയാണ് ഇപ്പോഴത്തെ വില. കഴിഞ്ഞ ആഴ്ചകളില്‍ ചിക്കന്റെ വില 80 രൂപ വരെ എത്തിയിരുന്നു. ഇപ്പോള്‍ 100 ലേക്കെത്തിയപ്പോള്‍ പ്രതീക്ഷ നല്കുന്നുവെന്ന് വ്യാപാരികള്‍ പറയുന്നു. അതേസമയം ചില്ലറ വിപണികളില്‍, കോഴി വില കുറഞ്ഞത് വ്യാപാരം കൂട്ടിയിട്ടുണ്ട്.
കോഴിയെ വളര്‍ത്തുന്ന ചെലവ് കൂടുകയും വില കുറയുകയും ചെയ്യുന്നത് കര്‍ഷകര്‍ക്കും വ്യാപാരികള്‍ക്കും പ്രതിസന്ധി തീര്‍ക്കുകയാണ്. 70 രൂപയോളം വളര്‍ത്തു ചെലവ് വരുന്ന കോഴിക്ക് 50 മുതല്‍ 60 രൂപ വരെയാണ് ഇടനിലക്കാര്‍ നല്‍കുക. ഇത് കര്‍ഷകര്‍ക്ക് തിരിച്ചടിയാണ്. വരും ദിവസങ്ങളില്‍ വില ഇനിയും കുറയും എന്നാണ് കച്ചവടക്കാര്‍ നല്‍കുന്ന സൂചന. രണ്ടാഴ്ചമുമ്പ് ഫാമുകളില്‍ കോഴിയുടെ വില കുറഞ്ഞതാണെങ്കിലും ചില്ലറക്കച്ചവടക്കാര്‍ വില കുറച്ചിരുന്നില്ല.പെട്ടെന്നുള്ള വിലക്കുറവ് കോഴി ഫാം നടത്തിപ്പുകാരെ പ്രതികൂലമായി ബാധിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: