തിരുവനന്തപുരം: കേരള ക്രിക്കറ്റ് ലീഗിലേക്കുള്ള താരലേലത്തില് 7.4 ലക്ഷം രൂപയ്ക്ക് ഓള് റൗണ്ടര് എം.എസ്. അഖിലിനെ ട്രിവാന്ഡ്രം റോയല്സും 7.2 ലക്ഷം രൂപയ്ക്ക് വിക്കറ്റ് കീപ്പര് വരുണ് നായനാരെ തൃശൂര് ടൈറ്റന്സും സ്വന്തമാക്കി.
ഓള് റൗണ്ടര് മനുകൃഷ്ണനെ കൊച്ചി ബ്ലൂ ടൈഗേഴ്സും ബാറ്റര് സല്മാന് നിസാറിനെ കാലിക്കട്ട് ഗ്ലോബ്സ്റ്റാഴ്സും ഏഴു ലക്ഷം രൂപയ്ക്കാണ് സ്വന്തമാക്കിയത്. 50000 രൂപ അടിസ്ഥാന പ്രതിഫലമുള്ള സി വിഭാഗത്തിലെ ഓള് റൗണ്ടര് എം. നിഖിലിനെ 4.6 ലക്ഷത്തിന് കാലിക്കട്ട് ഗ്ലോബ്സ്റ്റാഴ്സ് സ്വന്തമാക്കിയത് ശ്രദ്ധേയമായി. തിരുവനന്തപുരം ഹയാത്ത് റീജന്സിയില് നടന്ന താരലേലം ചാരു ശര്മാണ് നിയന്ത്രിച്ചത്.
കേരളത്തിന്റെ ആദ്യത്തെ ക്രിക്കറ്റ് ലീഗിലേക്കുള്ള വാശിയേറിയ താരലേലത്തില് 168 കളിക്കാരെയാണ് ഫ്രാഞ്ചൈസികള്ക്കു മുന്നില് കേരള ക്രിക്കറ്റ് അസോസിയേഷന് അണിനിരത്തിയത്. ഐപിഎല്, രഞ്ജി ട്രോഫി എന്നിവയില് കളിച്ചിട്ടുള്ളവരെ ‘എ’ വിഭാഗത്തില് ഉള്പ്പെടുത്തി രണ്ടു ലക്ഷം രൂപയും സി.കെ.നായിഡു, അണ്ടര് 23, അണ്ടര് 19 സ്റ്റേറ്റ്, അണ്ടര് 19 ചലഞ്ചേഴ്സ് മല്സരങ്ങളില് കളിച്ചിട്ടുള്ളവരെ ബി വിഭാഗത്തില് ഉള്പ്പെടുത്തി ഒരു ലക്ഷം രൂപയും അണ്ടര് 16 സ്റ്റേറ്റ്, യൂണിവേഴ്സിറ്റി കളിക്കാരും ക്ലബ് ക്രിക്കറ്റര്മാരുമായവരെ ‘സി’ വിഭാഗത്തില്പെടുത്തി അന്പതിനായിരം രൂപയും അടിസ്ഥാന പ്രതിഫലം നിശ്ചയിച്ചാണ് ലേലം നടത്തിയത്. ഇതില് ബി വിഭാഗത്തില് ഉള്പ്പെട്ട 7 പേര് എ വിഭാഗത്തിന്റെ അടിസ്ഥാന തുകയേക്കാള് ഉയര്ന്ന പ്രതിഫലം നേടി. ഓള് റൗണ്ടര് അക്ഷയ് മനോഹര് ഈ വിഭാഗത്തില് ഏറ്റവും കൂടിയ തുക നേടി. 3.6 ലക്ഷത്തിന് തൃശൂര് ടൈറ്റന്സാണ് അക്ഷയിനെ സ്വന്തമാക്കിയത്. ആകെ 108 താരങ്ങളെയാണ് ഫ്രാഞ്ചൈസികള് ലേലം കൊണ്ടത്.
