സോഷ്യൽ മീഡിയ വീഡിയോയുടെ സഹായത്തോടെ പടക്കം പൊട്ടിക്കാൻ ശ്രമം ; അഞ്ച് കുട്ടികൾക്ക് ഗുരുതര പരിക്ക്

മുസാഫർപൂർ: ബീഹാറിലെ മുസാഫർപൂർ ജില്ലയിൽ പടക്കം പൊട്ടിക്കാൻ സോഷ്യൽ മീഡിയയിൽ പ്രചരിക്കുന്ന വീഡിയോ കണ്ട് ശ്രമിച്ച അഞ്ച് കുട്ടികൾക്ക് ഗുരുതരമായി പരിക്കേറ്റതായി പോലീസ് അറിയിച്ചു. ജില്ലയിലെ മുന്നി ബംഗ്രി കല്യാൺ ഗ്രാമത്തിലാണ് സംഭവം നടന്നതെന്ന് സീനിയർ പോലീസ് സൂപ്രണ്ട് രാകേഷ് കുമാർ പറഞ്ഞു.

അയൽപക്കത്തുള്ള രണ്ട് വീടുകളിലെ കുട്ടികളാണ് അഞ്ച് പേരും. ഒരു ടോർച്ചിനെ പടക്കമാക്കി മാറ്റാമെന്ന് അവകാശപ്പെടുന്ന ഒരു വീഡിയോ അവർ കണ്ടു. ആരും കാണാതിരുന്നപ്പോൾ അവർ പരീക്ഷണം നടത്താൻ ശ്രമിച്ചുവെന്ന് എസ്എസ്പി പറഞ്ഞു.

അവർ തീപ്പെട്ടിക്കോലുകളിൽ നിന്ന് ചുവന്ന ഫോസ്ഫറസ് ചുരണ്ടുകയും കത്തുന്ന വസ്തുക്കൾ ബാറ്ററിയിൽ പ്രവർത്തിക്കുന്ന ടോർച്ചിൽ നിറയ്‌ക്കുകയും ചെയ്തു, തുടർന്ന് അത് പൊട്ടിത്തെറിക്കുകയുമായിരുന്നെന്ന് അദ്ദേഹം കൂട്ടിച്ചേർത്തു. പരിക്കേറ്റ എല്ലാ ആൺകുട്ടികളെയും ചികിത്സയ്‌ക്കായി ആശുപത്രിയിൽ പ്രവേശിപ്പിച്ചിരിക്കുകയാണ്.