അവിനാഷ് സാബ്ലെയ്‌ക്ക് ഇന്ന് ഫൈനല്‍

പാരീസ്: പുരുഷന്മാരുടെ 3000 മീറ്റര്‍ സ്റ്റീപ്പിള്‍ ചെയ്‌സില്‍ ഭാരതത്തിന്റെ അവിനാഷ് സാബ്ലെ ഇന്ന് ഫൈനലിനിറങ്ങും. ഭാരത സമയം രാത്രി 1.13നാണ് താരത്തിന്റെ മത്സരം. ഹീറ്റ്‌സില്‍ അഞ്ചാം സ്ഥാനക്കാരനായ് ഫിനിഷ് ചെയ്തു.

ഫൈനല്‍ യോഗ്യതയ്‌ക്കായുള്ള ഒന്നാം റൗണ്ട് മത്സരത്തിന്റെ ഹീറ്റ് രണ്ടില്‍ മത്സരിച്ച അവിനാഷ് 8:15.43 സമയത്തില്‍ ഫിനിഷ് ചെയ്താണ് അഞ്ചാം സ്ഥാനക്കാരനായത്. സീസണിലെ താരത്തിന്റെ മികച്ച പ്രകടനം 8:09.91 മീറ്റര്‍ ആണ്. ലോക റാങ്കിങ്ങില്‍ 15-ാം സ്ഥാനത്താണ് അവിനാഷ് സാബ്ലെ.

ഈ ഇനത്തിന്റെ ഒന്നാം റൗണ്ടില്‍ നിന്നും ഏറ്റവും മികച്ച പ്രകടനം കാഴ്‌ച്ചവച്ച് ഫൈനലിലെത്തിയിരിക്കുന്നത് മൊറോക്കോയുടെ മുഹമ്മദ് ടിന്‍ഡൗഫ്റ്റ് ആണ്. 8:10.62 ആണ് താരം ഹീറ്റ്‌സില്‍ കുറിച്ച സമയം. മൊറോക്കോയുടെ തന്നെ സൂഫെയ്ന്‍ എല്‍ ബക്കലി ആണ് ലോക ഒന്നാം നമ്പര്‍ സ്റ്റീപ്പിള്‍ ചെയ്‌സ് താരം.

വനിതകളുടെ 100 മീറ്റര്‍ ഹര്‍ഡില്‍സില്‍ ജ്യോതി യരാജിയും ജാവലിന്‍ ത്രോയില്‍ അന്നു റാണിയും മിക്സഡ് റിലേ മാരത്തണ്‍ റേസ് വാക്കിങ്ങില്‍ പ്രിയങ്ക ഗോസ്വാമി, സൂരജ് പവാര്‍ സഖ്യവും പുരുഷന്മാരുടെ ട്രിപ്പിള്‍ജമ്പില്‍ പ്രവീണ്‍ ചിത്രവേലും മലയാളി താരം അബ്ദുള്ള അബൂബക്കറും ഹൈജംപില്‍ സര്‍വേഷ് കുഷാറെയും ഇന്ന് അത്ലറ്റിക്സില്‍ മത്സരിക്കാനിറങ്ങും.