തിരുവനന്തപുരം : ഉരുള്പൊട്ടലില് സര്വവും നഷ്ടപ്പെട്ട വയനാട്ടിലെ മുണ്ടക്കൈയിലെയും ചൂരല്മലയിലെയും ജനങ്ങളെ സഹായിക്കാന് സാലറി ചലഞ്ചുമായി സംസ്ഥാന സര്ക്കാര്. ‘റീബില്ഡ് വയനാട്’ ന്റെ ഭാഗമായുളള പുനരധിവാസത്തിന് വേണ്ടി ശമ്പളത്തില് നിന്ന് വിഹിതം നല്കണമെന്ന് സര്വീസ് സംഘടനകളുടെ യോഗത്തില് മുഖ്യമന്ത്രി പിണറായി വിജയന് നിര്ദേശിച്ചു.
പത്ത് ദിവസത്തെ ശമ്പളം നല്കാമോ എന്നാണ് മുഖ്യമന്ത്രി യോഗത്തില് ചോദിച്ചത്. അഞ്ച് ദിവസത്തെ ശമ്പളം നല്കാന് സര്വീസ് സംഘടനകള്ക്ക് ഇടയില് ധാരണയായി. സാലറി ചലഞ്ച് നിര്ബന്ധം ആക്കരുതെന്നും താല്പര്യമുള്ളവര്ക്കായി പരിമിതപ്പെടുത്തണമെന്നും സംഘടനകള് ആവശ്യപ്പെട്ടു. ഗഡുക്കളായി നല്കാനുളള അവസരം നല്കണമെന്നും യോഗത്തില് നിര്ദേശമുയര്ന്നു.
ഇക്കാര്യത്തില് സര്ക്കാര് ഉടന് ഉത്തരവ് പുറത്തിറക്കും.അതിനിടെ പുനരധിവാസത്തിന് പ്രത്യേക പാക്കേജ് തയാറാക്കാനും മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന യോഗത്തില് തീരുമാനമെടുത്തു. ദുരന്ത മേഖലയിലെ തിരച്ചില് ഊര്ജ്ജിതമാക്കാനും തീരുമാനമായി.ചാലിയാറിലും തിരച്ചില് ഊര്ജിതമായി നടത്തും.
സഹായം ലഭ്യമാകാന് ഇടയുള്ള എല്ലായിടങ്ങളില് നിന്നും സ്വീകരിക്കും. ദേശീയ ദുരന്തനിവാരണ നിധിയില് നിന്ന് കൂടുതല് പണം ആവശ്യപ്പെടും. പുനരധിവാസം നടത്താന് കേന്ദ്രസഹായം അനിവാര്യമാണെന്നും യോഗം വിലയിരുത്തി.പൊളിഞ്ഞ് വീഴാന് സാധ്യതയുള്ള കെട്ടിടങ്ങള് പൊളിച്ചു നീക്കാനും യോഗത്തില് തീരുമാനിച്ചു.
ദേശീയ ദുരന്തമായി പ്രഖ്യാപിക്കണമെന്ന് വീണ്ടും സംസ്ഥാനം കേന്ദ്രത്തോട് ആവശ്യപ്പെടും. ഏറ്റവും തീവ്രത ഏറിയ ദുരന്തം എന്ന നിലയ്ക്ക് പരിഗണന വേണമെന്നും ആവശ്യം ഉന്നയിക്കും. അങ്ങിനെ എങ്കില് ദേശീയ ദുരന്ത നിവാരണ നിധിയില് നിന്നു ആകെ വേണ്ട തുകയുടെ 75 ശതമാനം ലഭിക്കുമെന്നും യോഗം വിലയിരുത്തി.
