കൊച്ചി: സിനിമാതാരം ഹരിശ്രീ അശോകന്റെ വീടിന്റെ നിര്മാണത്തില് വരുത്തിയ ഗുരുതരമായ പിഴവിന് 17.83 ലക്ഷം രൂപ നഷ്ടപരിഹാരം നല്കണമെന്ന് എറണാകുളം ജില്ലാ ഉപഭോക്തൃ തര്ക്ക പരിഹാര കോടതി. നടന്റെ ‘പഞ്ചാബിഹൗസ്’ എന്ന വീടിന്റെ പണി പൂര്ത്തിയായി അധികനാള് കഴിയും മുന്പ് തറയോടുകളുടെ നിറം മങ്ങി പൊട്ടിപ്പൊളിയാന് തുടങ്ങി. വെള്ളവും മണ്ണും ഉപരിതലത്തിലേക്ക് എത്തി.
പി.കെ. ടൈല്സ് സെന്റര്, കേരള എജിഎല് വേള്ഡ് എന്നീ സ്ഥാപനങ്ങളില് നിന്നുമാണ് ടൈല്സ് വാങ്ങിയത്. എന്എസ് മാര്ബിള് വര്ക്സിന്റെ ഉടമ പയസിന്റെ നേതൃത്വത്തിലാണ് ടൈല്സ് വിരിക്കുന്ന പണികള് നടന്നത്. ഇവരെ വിവരം അറിയിച്ചെങ്കിലും പരിഹരമുണ്ടായില്ല. പിന്നാലെയാണ് ഹരിശ്രീ അശോകന് ഉപഭോക്തൃ കോടതിയെ സമീപിച്ചത്. ഉത്പന്നം വാങ്ങിയതിന് രേഖകള് ഹാജരാക്കാന് പരാതിക്കാരന് കഴിഞ്ഞില്ലെന്നും ന്യൂനത സംബന്ധിച്ച് യാതൊരുവിധ തെളിവുകളുമില്ലെന്നും വാറണ്ടി രേഖകളൊന്നും ഇല്ലെന്നുള്ള നിലപാടാണ് എതിര്കക്ഷികള് കോടതിയില് സ്വീകരിച്ചത്. ടൈല്സ് വിരിച്ചത് തങ്ങളല്ലെന്നും അവര് വാദിച്ചു. എന്നാല് ഇന്വോയ്സും വാറണ്ടി രേഖകളും ടെസ്റ്റ് റിപ്പോര്ട്ടും നല്കാതെ ഉപഭോക്താവിനെ കബളിപ്പിക്കുകയും അടിസ്ഥാന അവകാശം ലംഘിക്കുകയും ചെയ്ത എതിര് കക്ഷികളുടെ പ്രവൃത്തി അധാര്മിക വ്യാപാര രീതിയുടെയും സേവനത്തിലെ ന്യൂനതയുടെയും നേര്ചിത്രമാണെന്ന് കോടതി വിലയിരുത്തി.
ഉപഭോക്താവിനെ വ്യവഹാരത്തിന് നിര്ബ്ബന്ധിതനാക്കിയ എതിര്കക്ഷികളുടെ പ്രവൃത്തി ഒരു തരത്തിലും അംഗീകരിക്കാനാകില്ലെന്ന് ഡി.ബി. ബിനു അധ്യക്ഷനും വൈക്കം രാമചന്ദ്രന്, ടി. എന്. ശ്രീവിദ്യ എന്നിവര് മെമ്പര്മാരുമായ ബെഞ്ച് അഭിപ്രായപ്പെട്ടു. പരാതിക്കാരനുണ്ടായ കഷ്ടനഷ്ടങ്ങള്ക്ക് രണ്ടാം എതിര്കക്ഷി 16,58,641 രൂപ നല്കണം. കൂടാതെ നഷ്ടപരിഹാരമായി എതിര്കക്ഷികള് ഒരു ലക്ഷം രൂപയും കോടതിച്ചെലവായി 25,000 രൂപയും ഒരു മാസത്തിനകം നല്കാന് കോടതി നിര്ദേശിച്ചു. ഹരിശ്രി അശോകന് വേണ്ടി അഡ്വ. ടി.ജെ. ലക്ഷ്മണ അയ്യര് ഹാജരായി.
