തിരുവനന്തപുരം: കനത്ത മഴ പെയ്യുമെന്ന മുന്നറിയിപ്പിന്റെ പശ്ചാത്തലത്തില് സംസ്ഥാനത്തെ ഏഴ് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് വെളളിയാഴ്ച(02.08.2024) അവധി പ്രഖ്യാപിച്ച് ജില്ലാ കളക്ടര്മാര്.പ്രൊഫഷണല് കോളേജുകള്ക്ക് അടക്കം അവധി ബാധകമാണ്.തൃശൂര് , മലപ്പുറം, കണ്ണൂര്,കാസര്കോട്, വയനാട്, കോഴിക്കോട് , പാലക്കാട് ജില്ലകളിലാണ് അവധി.
പാലക്കാട് അവധി
മഴക്കെടുതികളുടെ പശ്ചാത്തലത്തില് പാലക്കാട് ജില്ലയിലെ അങ്കണവാടികള്, കിന്റര്ഗാര്ട്ടന്, മദ്രസ, ട്യൂഷന് സെന്റര് ഉള്പ്പെടെ പ്ലസ്ടു വരെയുളള എല്ലാ വിദ്യാഭ്യാസ സ്ഥാപനങ്ങള്ക്കും വെളളിയാഴ്ച ജില്ലാ കളക്ടര് അവധി പ്രഖ്യാപിച്ചു.
മുന്കൂട്ടി നിശ്ചയിച്ച പൊതു പരീക്ഷകള്ക്കും റസിഡന്ഷ്യല് രീതിയില് പഠനം നടത്തുന്ന മോഡല് റസിഡന്ഷ്യല് സ്കൂളുകള്ക്കും നവോദയ വിദ്യാലയത്തിനും അവധി ബാധകമല്ല.
കോളേജുകള്ക്കും പ്രഫഷണല് കോളജുകള്ക്കും അവധി ബാധകമല്ല. നഷ്ടമാവുന്ന അധ്യയന ദിനങ്ങള്ക്ക് പകരം പ്രവര്ത്തിദിനങ്ങള് വിദ്യാഭ്യാസ വകുപ്പ് ക്രമീകരിക്കേണ്ടതാണ്.
അതേസമയം, ഇടുക്കിയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും വെള്ളിയാഴ്ച അവധി പ്രഖ്യാപിച്ചിട്ടുണ്ട്. എറണാകുളം ജില്ലയില് ദുരിതാശ്വാസ ക്യാമ്പുകളായി പ്രവര്ത്തിക്കുന്ന വിദ്യാഭ്യാസ സ്ഥാപനങ്ങള്ക്കും അവധിയാണ്
കോഴിക്കോട് അവധി
കോഴിക്കോട് ജില്ലയിലെ വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര് വെള്ളിയാഴ്ച അവധി പ്രഖ്യാപിച്ചു. ജില്ലയില് മഴ ശക്തമായി തുടരുന്ന സാഹചര്യത്തില് പ്രഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധിയായിരിക്കുമെന്നാണ് ജില്ലാ കളക്ടര് അറിയിച്ചത്.
കണ്ണൂര് അവധി
മഴ, ശക്തമായ കാറ്റ് എന്നിവയുടെ പശ്ചാത്തലത്തില് കണ്ണൂര് ജില്ലയിലെ അങ്കണവാടികള്, പ്രൊഫഷണല് കോളജുകള്, ട്യൂഷന് ക്ലാസുകള് അടക്കമുള്ള വിദ്യാഭ്യാസ സ്ഥാപനങ്ങള്ക്ക് വെള്ളിയാഴ്ച ജില്ലാ കളക്ടര് അവധി പ്രഖ്യാപിച്ചു. മുന് നിശ്ചയപ്രകാരമുള്ള പൊതുപരീക്ഷകള്, സര്വകലാശാല പരീക്ഷകള് എന്നിവയ്ക്ക് മാറ്റമില്ല. അവധി കാരണം നഷ്ടപ്പെടുന്ന പഠനസമയം ക്രമീകരിക്കാന് വിദ്യാഭ്യാസ സ്ഥാപന മേധാവികള് നടപടി സ്വീകരിക്കണം.
മലപ്പുറത്ത് അവധി
ശക്തമായ മഴ തുടരുന്ന പശ്ചാത്തലത്തില് മലപ്പുറം ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും വെളളിയാഴ്ച അവധി പ്രഖ്യാപിച്ച് ജില്ലാ കള്ക്ടര്. പ്രൊഫഷണല് കോളേജുകള് ഉള്പ്പെടെയുള്ള മുഴുവന് വിദ്യാഭ്യാസ സ്ഥാപനങ്ങള്ക്കും അവധി ബാധകമാണ്. അങ്കണവാടികള്, മദ്രസകള്, ട്യൂഷന് സെന്ററുകള് എന്നിവക്കെല്ലാം അവധിയായിരിക്കും.
തൃശൂര് അവധി
കാറ്റും വെള്ളക്കെട്ടും മഴ മുന്നറിയിപ്പ് തുടരുന്നതിനാലും സ്കൂളുകള് ദുരിതാശ്വാസ ക്യാമ്പുകളായി പ്രവര്ത്തിക്കുന്നതിനാലും തൃശൂര് ജില്ലയില് ദുരന്തസാഹചര്യം ഒഴിവാക്കുന്നതിനുള്ള മുന്കരുതല് നടപടിയുടെ ഭാഗമായി വെളളിയാഴ്ച ജില്ലയിലെ അങ്കണവാടികള്, നഴ്സറികള്, കേന്ദ്രീയ വിദ്യാലയങ്ങള്, സി.ബി.എസ്.ഇ, ഐ.സി.എസ്.ഇ സ്കൂളുകള്, പ്രൊഫഷണല് കോളജുകള്, ട്യൂഷന് സെന്ററുകള്, വിദ്യാര്ഥികള് താമസിച്ചു പഠിക്കുന്ന റസിഡന്ഷ്യല് സ്ഥാപനങ്ങള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കലക്ടര് അവധി പ്രഖ്യാപിച്ചു. മുന്കൂട്ടി നിശ്ചയിച്ച പരീക്ഷകള്ക്കും അഭിമുഖങ്ങള്ക്കും മാറ്റം ഉണ്ടായിരിക്കില്ല.
വയനാട്ടില് അവധി
വയനാട് ജില്ലയില് ശക്തമായ മഴ തുടരുന്നതിനാല് ട്യൂഷന് സെന്ററുകള്, അങ്കണവാടികള്, പ്രൊഫഷണല് കോളേജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് വെളളിയാഴ്ച ജില്ലാ കളക്ടര് അവധി പ്രഖ്യാപിച്ചു. റസിഡന്ഷല് സ്കൂളുകള്ക്ക് അവധി ബാധകമല്ല.
കാസര്കോട് അവധി
മഴ മുന്നറിയിപ്പിന്റെ പശ്ചാത്തലത്തില് മുന്കരുതല് എന്ന നിലയില് കാസര്കോഡ് ജില്ലയിലെ പ്രൊഫഷണല് കോളേജുകള്, സിബിഎസ്ഇ, ഐസിഎസ് സി സ്കൂളുകള് കേന്ദ്രീയ വിദ്യാലയങ്ങള്, അങ്കണവാടികള്, മദ്രസകള് ഉള്പ്പെടെ വിദ്യാഭ്യാസ സ്ഥാപനങ്ങള്ക്ക് വെള്ളിയാഴ്ച ജില്ലാ കളക്ടര് അവധി പ്രഖ്യാപിച്ചു. മുന്കൂട്ടി നിശ്ചയിച്ച പരീക്ഷകളില് മാറ്റമില്ല.
