തിരുവനന്തപുരം:സംസ്ഥാനത്ത് വടക്കന് ജില്ലകളില് കനത്ത മഴ.കോഴിക്കോട് ജില്ലയില് നദികളില് മലവെള്ളപ്പാച്ചിലുണ്ടായതിനെത്തുടര്ന്ന് താഴ്ന്ന പ്രദേശങ്ങളില് വെള്ളം കയറി. വയനാട്ടിലും കണ്ണൂരിലും മണ്ണിടിച്ചിലുണ്ടായി. വയനാട്ടില് ഏഴു കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റിപാര്പ്പിച്ചു.
കോഴിക്കോട് ജില്ലയിലെ മലയോര മേഖലയിലും നഗര പ്രദേശത്തിലും ശക്തമായ മഴ പെയ്തു. ഇരുവഴിഞ്ഞി പുഴയില് മലവെള്ളപ്പാച്ചില്. ചാലിപ്പുഴയിലും കൈവഴികളിലും ജലനിരപ്പുയര്ന്നു.
കോടഞ്ചേരി ചെമ്പു കടവ് പാലത്തില് വെള്ളം കയറി ഏറെ നേരം ഗതാഗതം തടസപ്പെട്ടു. പാലത്തില് വന്നടിഞ്ഞ തടിക്കഷ്ണങ്ങള് ജെ സി ബി ഉപയോഗിച്ച് നീക്കി ഒഴുക്ക് സുഗമമാക്കിയതോടെ പാലത്തിലെ വെളളം ഇറങ്ങി.
കുറ്റ്യാടി മരുതോങ്കരയില് ശക്തമായ കാറ്റടിച്ച് തെങ്ങ് വൈദ്യുത ലൈനില് വീണ് തീപിടിച്ചു.എന്നാല് വലിയ അപകടമുണ്ടായില്ല. കരുവന്തുരുത്തി പെരവന്മാട് കടവിന് സമീപം തോണി മറിഞ്ഞെങ്കിലും അതില് ഉണ്ടായിരുന്ന മൂന്നു പേരേയും നാട്ടുകാര് രക്ഷപ്പെടുത്തി. കൊയിലാണ്ടി ഹാര്ബറിന് സമീപം മത്സ്യബന്ധന വള്ളം മറിഞ്ഞു. വള്ളത്തിലുണ്ടായിരുന്ന മൂന്നു പേരേയും മറ്റു വള്ളങ്ങളിലുണ്ടായിരുന്ന മത്സ്യത്തൊഴിലാളികള് രക്ഷപ്പെടുത്തി.
വയനാട് കനത്ത മഴയില് പുഴകളില് ജലനിരപ്പ് ഉയര്ന്നു. മുണ്ടക്കൈ മലയിലെ ജനവാസമില്ലാത്ത മേഖലയിലും മാനന്തവാടി ഹയര്സെക്കന്ഡറി സ്കൂള് കൂവളം കുന്ന് റോഡിലും മണ്ണിടിച്ചിലുണ്ടായി. പുത്തുമല കാശ്മീര് ദ്വീപിലേയും പുഞ്ചിരി മട്ടം കോളനിയിലേയും ഏഴ് കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റി. തൊള്ളായിരം കണ്ടി ഉള്പ്പെടെയുള്ള സ്ഥലങ്ങളിലെ അഡ്വഞ്ചര് പാര്ക്കുകളുടെ പ്രവര്ത്തനത്തിനും ട്രക്കിംഗിനും നിരോധനം ഏര്പ്പെടുത്തി. ബാണാസുര സാഗര് ഡാം ചൊവ്വാഴ്ച രാവിലെ തുറക്കും.
കണ്ണൂര് ജില്ലയില് മലയോര മേഖലയില് കനത്ത മഴ തുടരുന്നു. ചീങ്കണ്ണി ബാവലിപ്പുഴയില് ജലനിരപ്പ് ഉയര്ന്നു. ഇരിട്ടി വളവ് പാറയിലുണ്ടായ മണ്ണിടിച്ചിലിന്റെ പശ്ചാത്തലത്തില് കൂട്ടുപുഴ വള്ളിത്തോട് റോഡ് താത്കാലികമായി അടച്ചു. പാലത്തും കടവില് വീടിന്റെ മതിലിടിഞ്ഞു. കനത്ത മഴയില് പുന്നപ്പുഴ കരകവിഞ്ഞ് മലപ്പുറം മുപ്പിനിയില് പാലം മുങ്ങി. നിലമ്പുര് വെളിയന്തോട് റോഡില് വെള്ളം കയറി. കരിമ്പുഴയും ചാലിയാറും കരകവിഞ്ഞു.
മലപ്പുറത്ത് മലയോര മേഖലകളില് കനത്ത മഴ. ഇടവേളകളില്ലാതെ പെയ്യുന്ന മഴയില് റോഡുകളില് വെള്ളം കയറി പലയിടത്തും ഗതാഗതം തടസപ്പെട്ടു. പുഴകള് കരകവിഞ്ഞ് ഒഴുകുന്നു. വ്യാപകമായി കൃഷി നാശവും ഉണ്ടായി.
ഇടുക്കിയില് മഴ കനത്തു. കട്ടപ്പന, മൂന്നാര്, നെടുങ്കണ്ടം, വണ്ടിപ്പെരിയാര് എന്നിവിടങ്ങളിലാണ് ശക്തമായ മഴ പെയ്യുന്നത്.കുമളി -മൂന്നാര് റോഡില് വിവിധയിടങ്ങളില് മണ്ണിടിഞ്ഞു. മൂന്നാര് ഗ്യാപ് റോഡിലും ഗതാഗത തടസമുണ്ടായി.
തിരുവനന്തപുരം, കൊല്ലം ജില്ലകളിലും മഴയുണ്ട്.
