കൊല്ലം: നിയന്ത്രണം വിട്ട ആംബുലൻസ് വൈദ്യുത പോസ്റ്റിലിടിച്ച ശേഷം മുന്നോട്ട് നീങ്ങി തലകീഴായി മറിഞ്ഞു. ഇടിയുടെ ആഘാതത്തിൽ വൈദ്യുത പോസ്റ്റ് രണ്ടായി മുറിഞ്ഞു. സംഭവത്തിൽ ആംബുലൻസിലുണ്ടായിരുന്ന അഞ്ച് പേർക്ക് പരിക്കേറ്റെങ്കിലും ആരുടെയും നില ഗുരുതരമല്ല.
ഇന്ന് വൈകിട്ട് മൂന്നരയോടെ ഓച്ചിറ വവ്വാക്കാവ് മണപ്പള്ളി വടിമുക്ക് ജംഗ്ഷന് സമീപമായിരുന്നു സംഭവം. നിയന്ത്രണം വിട്ട ആംബുലൻസ് വൈദ്യുത പോസ്റ്റിൽ ഇടിച്ച ശേഷം റോഡിൽ തലകീഴായി മറിയുകയായിരുന്നു. സംഭവത്തിന് പിന്നാലെ പ്രദേശത്ത് ഏറെ നേരം ഗതാഗതം തടസ്സപ്പെട്ടു. അഗ്നിരക്ഷാ സേനയെത്തിയാണ് ആംബുലൻസ് ഉയർത്തിയത്.
