കൊച്ചി: ബസോടിക്കെ വഴിനീളെ ഹോണ്‍ മുഴക്കിയ ഡ്രൈവറെ ഓഫീസിലേക്ക് വിളിച്ചു വരുത്തി രണ്ട് മണിക്കൂര്‍ നിന്ന നില്‍പ്പില്‍ നിര്‍ത്തി ഗതാഗത നിയമ പുസ്തകം വായിപ്പിച്ച് ആര്‍ ടി ഒ. എലൂര്‍- മട്ടാഞ്ചേരി റൂട്ടില്‍ സര്‍വീസ് നടത്തുന്ന ബസാണ് ഹോണ്‍ മുഴക്കി ആര്‍ടിഒയുടെ മുന്നില്‍ കുടുങ്ങിയത്.
വ്യാഴാഴ്ച രാവിലെയാണ് ഏലൂര്‍ ഫാക്ട് ജംഗ്ഷനിനു സമീപം ആര്‍ടിഒ കെ. മനോജിന്റെ കാറിന് പിന്നിലൂടെ അമിത ശബ്ദത്തില്‍ തുടരെ ഹോണ്‍ മുഴക്കി ബസ് വന്നത്. ഇത് ശല്യമായതോടെ അടുത്ത സ്റ്റോപ്പില്‍ ആര്‍ടിഒ ബസ് തടഞ്ഞു.
ട്രിപ് അവസാനിച്ച ശേഷം ആര്‍ടി ഓഫീസിലെത്താന്‍ ഡ്രൈവറോട് ആവശ്യപ്പെട്ട പ്രകാരം ഡ്രൈവര്‍ മഞ്ഞുമ്മല്‍ സ്വദേശി ജിതിന്‍ ഉച്ചയ്‌ക്ക് ശേഷം മൂന്ന് മണിയോടെ ആര്‍ടി ഓഫിസിലെത്തി. തുടര്‍ന്ന് മലയാളത്തില്‍ അച്ചടിച്ച ഗതാഗത നിയമ പുസ്തകം നല്‍കിയ ശേഷം ചേംബറിന്റെ ഒരു വശത്തേക്ക് മാറി നിന്ന് വായിക്കാന്‍ നിര്‍ദേശിക്കുകയായിരുന്നു.
അഞ്ച് മണിയോടെയാണ് പുസ്തകം വായിച്ച് കഴിഞ്ഞത്. പിന്നാലെ ഏതാനും ചോദ്യങ്ങള്‍ ചോദിച്ച് ഉത്തരം പറയിച്ച ശേഷമാണ് ഡ്രൈവറെ വിട്ടയച്ചത്.
പ്രതികരിക്കാൻ ഇവിടെ എഴുതുക: