തിരുവനന്തപുരം: കെല്‍ട്രോണിന് പ്രതിരോധ മേഖലയില്‍ നിന്ന് വീണ്ടും സുപ്രധാന ഓര്‍ഡര്‍ ലഭിച്ചു. കെല്‍ട്രോണ്‍ ഉപ കമ്പനിയായ കുറ്റിപ്പുറം കെല്‍ട്രോണ്‍ ഇലക്ട്രോ സെറാമിക്‌സ് ലിമിറ്റഡിന് (കെഇസിഎല്‍) 17 കോടി രൂപയുടെ ഓര്‍ഡറാണ് ലഭിച്ചത്.
നാവികസേനയുടെ പ്രധാന പദ്ധതികളിലൊന്നായ എഎസ്ഡബ്ല്യൂ ഷാലോ വാട്ടര്‍ ക്രാഫ്റ്റിലെ സോണാറുകള്‍ക്ക് ആവശ്യമായ നൂതന ട്രാന്‍സ്ഡ്യൂസര്‍ എലമെന്റുകള്‍ നിര്‍മിച്ചു നല്കുന്നതിനാണ് ബെംഗളൂരുവിലെ ഭാരത് ഇലക്ട്രോണിക്സ് ലിമിറ്റഡ് മുഖേന ഓര്‍ഡര്‍ ലഭിച്ചിരിക്കുന്നത്. ഓര്‍ഡറിന്റെ അടിസ്ഥാനത്തില്‍ രണ്ടായിരത്തിലധികം ട്രാന്‍സ്ഡ്യൂസര്‍ എലമെന്റുകള്‍ കെഇസിഎല്‍ നിര്‍മിച്ചു നല്കും.
സമുദ്രത്തിനടിയിലുള്ള ശബ്ദതരംഗങ്ങളിലൂടെ മറ്റ് കപ്പലുകളുടെയും അന്തര്‍വാഹിനികളുടെയും സാന്നിധ്യം തിരിച്ചറിയുന്നതിനായി ഉപയോഗിക്കുന്ന ഉപകരണങ്ങളായ ഹൈഡ്രോഫോണുകളുടെ പ്രധാന ഘടകമാണ് ട്രാന്‍സ്ഡ്യൂസറുകള്‍. രാജ്യത്ത് ആഭ്യന്തരമായി ട്രാന്‍സ്ഡ്യൂസറുകള്‍ നിര്‍മിക്കുന്ന പൊതുമേഖലാ സ്ഥാപനമാണ് കെഇസിഎല്‍. അനവധി വര്‍ഷങ്ങളായി അണ്ടര്‍ വാട്ടര്‍ മേഖലയിലേക്ക് വിവിധതരം പ്രതിരോധ ഇലക്ട്രോണിക്സ് ഉപകരണങ്ങള്‍ നാവികസേനയ്‌ക്കായി കെല്‍ട്രോണ്‍ നിര്‍മിച്ചു നല്കുന്നുണ്ട്.
പ്രതികരിക്കാൻ ഇവിടെ എഴുതുക: