കണ്ണൂര്: സ്കൂളിന്റെ ഓഫീസ് മുറി കുത്തിത്തുറന്ന് 40 മുട്ടകള് മോഷ്ടിച്ച് കള്ളന്. കണ്ണൂര് കണ്ണപുരത്താണ് സംഭവം. ചെറുകുന്ന് പള്ളിക്കരയിലെ എഡി എല്പി സ്കൂളില് ആണ് മോഷണം നടന്നത്. കുട്ടികള്ക്ക് പാകം ചെയ്ത് നല്കാന് സൂക്ഷിച്ചിരുന്ന മുട്ടകളാണ് മോഷണം പോയത്.
മുട്ടയ്ക്കൊപ്പം ഡയറിയില് സൂക്ഷിച്ചിരുന്ന 1800 രൂപയും മോഷ്ടാവ് കവര്ന്നു. ആകെ 2500 രൂപയുടെ മുതലുകള് നഷ്ടപ്പെട്ടു എന്നാണ് സ്കൂള് അധികൃതര് നല്കിയ പരാതിയില് പറഞ്ഞിട്ടുള്ളത്.
ജൂലായ് 15നും 18ന് രാത്രി 7.15നും ഇടയിലുള്ള സമയത്താണ് കവര്ച്ച നടന്നതെന്നാണ് പ്രധാനാദ്ധ്യാപിക പിജെ രേഖ ജെയ്സി പറയുന്നത്. സംഭവത്തില് കണ്ണപുരം പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
