കൊല്ലം: കൊട്ടാരക്കര ഗവ. ആശുപത്രിയില് കൊലചെയ്യപ്പെട്ട ഡോ. വന്ദനാദാസ് വധക്കേസിലെ സാക്ഷി വിസ്താരം ആരംഭിക്കുന്നതിന്റെ ഭാഗമായി പ്രതി സന്ദീപിനെ കുറ്റപത്രം വായിച്ച് കേള്പ്പിച്ചു. കൊല്ലം അഡീ. സെഷന്സ് ജഡ്ജി പി. എന്. വിനോദ് നേരിട്ടാണ് കുറ്റപത്രം വായിച്ചത്.
ഡോ. വന്ദനയെ കൊലപ്പെടുത്തിയതിന് കൊലപാതകുറ്റവും കേസിലെ 2 മുതല് 5 വരെ സാക്ഷികളെ ദേഹോപദ്രവം ഏല്പിച്ചു കൊല്ലാന് ശ്രമിച്ചതിന് വധശ്രമവും സര്ക്കാര് ജീവനക്കാരായ സാക്ഷികളുടെ ഔദ്യോഗിക കൃത്യനിര്വഹണം തടസപ്പെടുത്തിയതിനും ആശുപത്രി ജീവനക്കാരെ അക്രമിച്ചതിനും തെളിവ് നശിപ്പിക്കാന് ശ്രമിച്ചതിനും ഉള്പ്പെടെയുള്ള വകുപ്പുകള് പ്രകാരമുള്ള കുറ്റങ്ങള് ആണ് പ്രതിക്ക് മേല് ചുമത്തിയിട്ടുള്ളത്. കുറ്റം ചെയ്തിട്ടുണ്ടോ എന്ന കോടതിയുടെ ചോദ്യത്തിന് ഇല്ലെന്ന മറുപടിയാണ് പ്രതി നല്കിയത്.
പ്രതിയുടെ വിടുതല് ഹര്ജി തള്ളിയ കോടതി ഉത്തരവ് ശരിവെച്ച ഹൈക്കോടതി ഉത്തരവിനെതിരെ സുപ്രീംകോടതിയെ സമീപിച്ചിട്ടുണ്ടെന്നും അതുകൊണ്ട് കുറ്റപത്രം വായിച്ചു കേള്പ്പിക്കുന്നത് മാറ്റിവെക്കണമെന്നും ആവശ്യപ്പെട്ട് പ്രതിഭാഗം കോടതിയില് ഹര്ജി ഫയല് ചെയ്തിരുന്നു.
എന്നാല്, നിലവില് കേസ് നടപടികള് തുടരുന്നത് സംബന്ധിച്ച് മേല്ക്കോടതിയുടെ സ്റ്റേ ഇല്ലാത്തതിനാല് കുറ്റപത്രം വയിച്ചുകേള്പ്പിക്കുന്നത് മറ്റിവെയ്ക്കരുതെന്ന കേസിലെ സ്പെഷ്യല് പ്രോസിക്യൂട്ടര് അഡ്വ. പ്രതാപ് ജി. പടിക്കല് കോടതിയില് ശക്തമായി ആവശ്യപ്പെട്ടു. തുടര്ന്ന് ഇരുഭാഗത്തിന്റെയും വാദം കേട്ട കോടതി പ്രതിയുടെ ഹര്ജി തള്ളി.
കേസില് സപ്തം. 2 മുതല് സാക്ഷി വിസ്താരത്തിന് തയ്യാറാകാന് കോടതി ഇരുഭാഗത്തോടും ആവശ്യപ്പെട്ടു. സാക്ഷി വിസ്താരം ഷെഡ്യൂള് ചെയ്യുന്നതിനായി കേസ് ഈ മാസം 24 ലേക്ക് മാറ്റി. പ്രോസിക്യൂഷന് വേണ്ടി അഡ്വ. പ്രതാപ് ജി പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവന്, ഹരീഷ് കാട്ടൂര് എന്നിവരാണ് ഹാജരാകുന്നത്.
