മസ്‌ക്കറ്റ്: ഒമാന്‍ മസ്‌ക്കറ്റ് വാദി അല്‍ കബീറിലെ പള്ളിക്ക് സമീപമുണ്ടായ വെടിവയ്‌പ്പിന്റെ ഉത്തരവാദിത്തം ഭീകര സംഘടനയായ ഐഎസ് ഏറ്റെടുത്തു. ഭാരതീയര്‍ ഉള്‍പ്പടെ ആറ് പേരാണ് ആക്രമണത്തില്‍ കൊല്ലപ്പെട്ടത്. പള്ളിക്കുള്ളില്‍ ആക്രമണം നടത്തിയ മൂന്ന് അക്രമികളെ റോയല്‍ ഒമാന്‍ പോലീസ് വെടിവച്ച് കൊന്നു.
തിങ്കളാഴ്ച വൈകിട്ട് വാദി അല്‍ കബീറിലെ ഷിയാ പള്ളിക്ക് സമീപമാണ് വെടിവയ്‌പ്പുണ്ടായത്. തോക്കുധാരികളായ മുന്നുപേര്‍ ആളുകള്‍ക്കുനേരെ വെടിയുതിര്‍ക്കുകയായിരുന്നു. നിരവധി പേര്‍ക്ക് വെടിയേറ്റു. ഒമാന്‍ പോലീസും തിരിച്ചടിച്ചു. പള്ളി ആക്രമിക്കുന്നതിന്റെ വീഡിയോ ദൃശ്യങ്ങള്‍ ടെലിഗ്രാമിലൂടെ ഐഎസ് പുറത്തുവിട്ടിട്ടുണ്ട്
ആക്രമണത്തില്‍ 24ലേറെ പേര്‍ക്ക് പരിക്കേറ്റിട്ടുണ്ട്. അടിയന്തര സേവനം നടത്തുന്ന നാല് ജീവനക്കാരും പരിക്കേറ്റവരില്‍ ഉള്‍പ്പെടും.
ആക്രമണത്തിന്റെ കാരണം വ്യക്തമല്ലെന്ന് പോലീസ് അറിയിച്ചു. മരിച്ചവരില്‍ നാല് പേര്‍ പാക് പൗരന്മാരാണെന്നും നിരവധി പാകിസ്ഥാനികള്‍ പരിക്കേറ്റ് ചികിത്സയിലാണെന്നും പാക് വിദേശകാര്യമന്ത്രാലയം അറിയിച്ചു.
പ്രതികരിക്കാൻ ഇവിടെ എഴുതുക: