ചേര്‍ത്തല: പ്രാണന്‍ നല്‍കിയും വെള്ളാപ്പള്ളി നടേശനായി പോരാടുമെന്ന് എസ്എന്‍ഡിപി നേതൃയോഗം പ്രമേയം പാസാക്കി. ഈഴവ സമുദായത്തിന്റെയും പിന്നാക്ക ജനവിഭാഗങ്ങളുടെയും പടനായകനാണ് എസ്എന്‍ഡിപി യോഗം ജനറല്‍ സെക്രട്ടറിയും എസ്എന്‍ ട്രസ്റ്റ് സെക്രട്ടറിയുമായ വെള്ളാപ്പള്ളി നടേശന്.
സമുദായത്തിനുവേണ്ടി രക്തസാക്ഷിയാകാന്‍ മടിയില്ലാത്ത സമര്‍പ്പിത മനസുള്ള നേതാവ്. സമുദായത്തിന്റെ അവകാശങ്ങള്‍ക്കായി അദ്ദേഹം നിരന്തരം അധികാര കേന്ദ്രങ്ങളോട് ഏറ്റുമുട്ടുന്നു. ഭരണകൂടവും രാഷ്‌ട്രീയ പാര്‍ട്ടികളും ഈഴവരടക്കമുള്ള പിന്നാക്ക വിഭാഗങ്ങളോട് പുലര്‍ത്തുന്ന അവഗണന തുറന്നുകാട്ടുന്നു. ന്യൂനപക്ഷങ്ങള്‍ അര്‍ഹതയില്ലാത്തത് തട്ടിയെടുക്കുമ്പോള്‍ ഒഴിവാക്കപ്പെടുന്നതും പിന്തള്ളപ്പെടുന്നതും ഈഴവരും, തീയ്യരടക്കമുള്ള പിന്നാക്ക വിഭാഗങ്ങളാണ്. ഇതിനെതിരായ രണ്ടാം ഈഴവ മെമ്മോറിയല്‍ ആയിരുന്നു ജനറല്‍ സെക്രട്ടറിയുടെ വാക്കുകള്‍.
ഡോക്ടര്‍ പല്‍പ്പുവിന്റെ നേതൃത്വത്തില്‍ ഈഴവ മെമ്മോറിയല്‍ സമര്‍പ്പിച്ചപ്പോള്‍ തിരുവിതാംകൂര്‍ ഭരണകൂടത്തിന്റെ ഭാഗത്തു നിന്നുണ്ടായതിനു സമാനമായ പ്രതികരണമാണ് ചില ന്യൂനപക്ഷ സംഘടനാ നേതാക്കളുടേയും രാഷ്‌ട്രീയ പാര്‍ട്ടി നേതാക്കളുടെ ഭാഗത്തു നിന്നും ഇപ്പോള്‍ ഉണ്ടായത്.
വെള്ളാപ്പള്ളി നടേശന് പരിപൂര്‍ണ പിന്തുണ പ്രഖ്യാപിക്കുന്നതായും എസ്എന്‍ഡിപി യോഗത്തിന്റെ കേരളത്തില്‍ നിന്നും കേരളത്തിന് പുറത്തു നിന്നുമുള്ള സംഘടനയുടെ ഭാരവാഹികള്‍ ചേര്‍ന്ന് അംഗീകരിച്ച പ്രമേയത്തില്‍ പറയുന്നു.
പ്രതികരിക്കാൻ ഇവിടെ എഴുതുക: