കണ്ണൂർ: പെട്രോൾ പമ്പ് ജീവനക്കാരനെ ബോണറ്റിലിരുത്തി കാറോടിച്ച് കൊല്ലാൻ ശ്രമിച്ച കേസിൽ പോലീസുകാരനെ അറസ്റ്റ് ചെയ്തു. എ.ആർ ക്യാമ്പ് ഡ്രൈവർ കെ സന്തോഷ് കുമാറിനെയാണ് അറസ്റ്റ് ചെയ്തത്. പ്രതിക്കെതിരെ വധശ്രമത്തിനാണ് പോലീസ് കേസ് രജിസ്റ്റർ ചെയ്തിരിക്കുന്നത്. തളാപ്പിലെ ഭാരത് പെട്രോൾ പമ്പിലെ ജീവനക്കാരനായ അനിൽ കുമാറിനെയാണ് ഇയാൾ ആക്രമിക്കാൻ ശ്രമിച്ചത്.
സന്തോഷ് കുമാറിനെ സർവീസിൽ നിന്നും സിറ്റി പോലീസ് കമ്മീഷണർ സസ്‌പെൻഡ് ചെയ്തിട്ടുണ്ട്. കഴിഞ്ഞ ദിവസം വൈകുന്നേരം മൂന്ന് മണിയോടുകൂടിയായിരുന്നു സംഭവം. പെട്രോൾ അടിച്ച പണം മുഴുവൻ നൽകാതെ പോകാൻ ശ്രമിച്ച കാറിനെ ജീവനക്കാരൻ തടയാൻ ശ്രമിച്ചപ്പോഴായിരുന്നു ആക്രമണം. പെട്രോൾ അടിച്ച പണത്തിന്റെ ബാക്കി ഇതുവരെയായിട്ടും കിട്ടിയിട്ടില്ലെന്ന് അനിൽ കുമാർ അറിയിച്ചു.
പെട്രോൾ പമ്പിലേക്ക് സന്തോഷ് കുമാർ സ്വന്തം കാറിലായിരുന്നു എത്തിയിരുന്നത്. 2100 രൂപയ്‌ക്ക് പെട്രോൾ അടിക്കാൻ അനിൽ കുമാറിനോട് ആവശ്യപ്പെട്ടിരുന്നു. ഫുൾടാങ്ക് അടിച്ച ശേഷം 1900 രൂപ മാത്രം നൽകി. ബാക്കി 200 രൂപ നൽകാൻ പ്രതി കൂട്ടാക്കിയിരുന്നില്ല. ബാക്കി പണം ചോദിച്ചപ്പോൾ വണ്ടിയിൽ നിന്ന് തിരിച്ചെടുത്തോയെന്ന വിചിത്രമായ മറുപടിയാണ് പ്രതി നൽകിയതെന്നും അനിൽ കുമാർ പറഞ്ഞു. കാർ മുന്നോട്ടെടുക്കാൻ ശ്രമിച്ചപ്പോൾ ജീവനക്കാരൻ തടയുകയായിരുന്നു. ഇതോടെ കാറിന്റെ ബോണറ്റിലിരുത്തി അനിൽ കുമാറുമായി പ്രതി വാഹനം മുന്നോട്ടെടുക്കുകയായിരുന്നു. 600 മീറ്റർ ദൂരമാണ് കാറിൻറെ ബോണറ്റിലിരുന്ന് ജീവനക്കാരന് സഞ്ചരിക്കേണ്ടി വന്നത്.
കഴിഞ്ഞ വര്‍ഷം ഒക്ടോബറിലും കണ്ണൂര്‍ കളക്ടറേറ്റിന് മുന്നിലെ പെട്രോള്‍ പമ്പില്‍ പൊലീസ് ജീപ്പ് ഇടിച്ച് കയറ്റിയ കേസിലും സന്തോഷ് കുമാർ പ്രതിയായിരുന്നു. നിയന്ത്രണം വിട്ട പോലീസ് ജീപ്പ് കണ്ണൂര്‍ നഗരമദ്ധ്യത്തിലെ പെട്രോള്‍ പമ്പിലേക്ക് ഇരച്ചുകയറുകയായിരുന്നു.
പ്രതികരിക്കാൻ ഇവിടെ എഴുതുക: