കോട്ടയം: ജില്ലയിലെ ഒരു വനിതാ എസ് ഐയുടെ പ്രായപൂര്ത്തിയാകാത്ത മകനെ ജനനതിയതി തെറ്റിച്ചു ചേര്ത്ത് പോക്സോ കേസില് പ്രതിയാക്കി 20 ദിവസം ജയിലിലിട്ട സംഭവത്തില് പോലീസിനെതിരെ മുഖ്യമന്ത്രിക്കും മനുഷ്യാവകാശ കമ്മീഷനും പരാതി. അതിജീവതയ്ക്ക് പ്രായപൂര്ത്തിയായിരുന്നെങ്കിലും അതു മറച്ചുവച്ച് പോലീസ് പോക്സോ കേസ് ചുമത്തുകയായിരുന്നുവെന്നും പരാതിയില് പറയുന്നു. കേസ് നിലനില്ക്കില്ലെന്ന് കോട്ടയം ഫാസ്റ്റ് ട്രാക്ക് സ്പെഷ്യല് കോടതി വിധിച്ചതോടെയാണ് വിദ്യാര്ത്ഥി ജയിലില് നിന്ന് പുറത്തു വന്നത്. തുടര്ന്ന് തന്നോട് അനീതി കാണിച്ച രണ്ട് ഡിവൈഎസ് പി മാര്ക്കെതിരെ പരാതി നല്കുകയായിരുന്നു. 2023 നവംബര് 28നാണ് വിദ്യാര്ഥിയെ അറസ്റ്റ് ചെയ്തത്.
