മൂവാറ്റുപുഴ: യുവാവിനെ സംഘം ചേര്ന്ന് ആക്രമിച്ച് ബിയര് കുപ്പിക്ക് അടിച്ച് കൊലപ്പെടുത്തിയ കേസില് നാല് ഡിവൈഎഫ്ഐ- സിപിഎം നേതാക്കള് കൂടി പിടിയില്. നേരത്തെ മൂന്നു പേരെ അറസ്റ്റ് ചെയ്തിരുന്നു. തോട്ടഞ്ചേരി ശാന്തഭവനില് അമോല് എസ്. കരുണാകരന്, അനൂപ് കൃഷ്ണന്, വാലാംപാറയില് അതുല് ജിജി, ആല്ബിന് ജോര്ജ് എന്നിവരാണ് ഇന്നലെ മൂവാറ്റുപുഴ പോലീസ് സ്റ്റേഷനിലെത്തി കീഴടങ്ങിയത്. പ്രതികളെ ഒളിവില് കഴിയാന് സിപിഎം നേതാക്കള് സഹായം ചെയ്യുന്നതായി കാട്ടി ബിജെപി പ്രതിഷേധവുമായി രംഗത്തെത്തിയിരുന്നു.
പുല്ലുവഴി കാല്പ്പടിക്കല് (പാണ്ടംകോട്ടില്) ശബരിപാല് (40) ആണ് ജൂണ് 22ന് കൊല്ലപ്പെട്ടത്. മൂവാറ്റുപുഴ കച്ചേരിത്താഴത്ത് ബാറിന് സമീപമാണ് സംഭവം നടന്നത്. അഞ്ചല്പ്പെട്ടി ആനിത്തൊട്ടിയില് ദീപു വര്ഗീസ് (30), തോട്ടഞ്ചേരി മുന്തരിങ്ങാട്ട് ആഷിന് ഷിബി (19), തോട്ടഞ്ചേരി കാനാക്കുന്നേല് ടോജി തോമസ് (24) എന്നിവരെയാണ് നേരത്തെ അറസ്റ്റ് ചെയ്തത്. ബിയര് കുപ്പി കൊണ്ട് തലയ്ക്ക് അടിയേറ്റ ശബരിപാല് കാറിന്റെ താക്കോല് ഇവര്ക്ക് നല്കിയ ശേഷം വീട്ടില് എത്തിക്കാന് അപേക്ഷിച്ചു.
തുടര്ന്ന് സംഘം യുവാവിനെ കാറില് വീട്ടിലെത്തിക്കാന് ശ്രമിച്ചുവെങ്കിലും വഴി പറഞ്ഞു നല്കാന് യുവാവിന് കഴിയാതെ വന്നതോടെ തിരികെ ബാറിന് സമീപമെത്തി. അപ്പോഴേക്കും ശബരിപാല് ബോധരഹിതനായി. ഇതോടെ മൂവാറ്റുപുഴ ജനറല് ആശുപത്രിയില് എത്തിച്ചശേഷം സംഘം സ്ഥലംവിട്ടു. സിസിടിവി ദൃശ്യങ്ങളുടെ അടിസ്ഥാനത്തില് ആണ് പ്രതികളെ പോലീസ് തിരിച്ചറിഞ്ഞത്. കേസിലെ പ്രതികള്ക്കെല്ലാം പാര്ട്ടിയുടെ വിവിധ ചുമതലകളുണ്ട്.
