വിഴിഞ്ഞം: വിഴിഞ്ഞം അന്താരാഷ്ട്ര തുറമുഖത്തെത്തിയ ആദ്യ മദര്ഷിപ്പായ സാന് ഫെര്ണാണ്ടോയ്ക്ക് ആഴിമല ശിവക്ഷേത്ര ദേവസ്വം ട്രസ്റ്റ് ഊഷ്മള വരവേല്പ്പ് നല്കി.
ആഴിമല തീരത്തോട് ചേര്ന്ന് പ്രത്യേകം തയ്യാറാക്കിയ സ്ഥലത്ത് കൊടിതോരണങ്ങള് അലങ്കരിച്ച്, ചെണ്ട, മറ്റ് വാദ്യമേളങ്ങളുടെ അകമ്പടിയോടെ ക്ഷേത്രത്തിലെത്തിയ ഭക്തജനങ്ങളും വിദേശീയരും നാട്ടുകാരും ഉള്പ്പെടെ നൂറുക്കണക്കിന് ആളുകള് കപ്പലിന് വരവേല്പ്പ് നല്കാന് എത്തിയിരുന്നു.
ആഴിമല തീരത്തെത്തിയ കപ്പലിന് മുന്നില് ദേശീയ പതാക ഉയര്ത്തി. തുടര്ന്ന് ക്ഷേത്ര മേല്ശാന്തി ജ്യോതിഷ് പോറ്റി പുഷ്പവൃഷ്ടി നടത്തി ആരതി ഉഴിഞ്ഞ് കപ്പലിനെ സ്വീകരിച്ചു. പുറംകടലില് നങ്കൂരമിട്ട കപ്പല് വിഴിഞ്ഞം തുറമുഖത്തേക്ക് തിരിയുന്നത് ആഴിമല ഭാഗത്ത് കടലില് സ്ഥാപിച്ചിട്ടുള്ള ബോയകളിലൂടെയാണ്. സ്വീകരണത്തിന് ക്ഷേത്ര ട്രസ്റ്റ് പസിഡന്റ് രാജേന്ദ്രന്, ജനറല് സെക്രട്ടറി എന്. വിജയന്, ട്രഷറര് വിഷ്ണു എന്നിവര് നേതൃത്വം നല്കി.
