കാലടി: സംസ്കൃതം, വേദം, ആയുര്വേദം, ജ്യോതിഷം എന്നിമേഖലകളില് അഗാധമായ പാണ്ഡിത്യമുള്ള മഹാനാണ് പ്രൊഫ. കെ.വി. ശേഷാദ്രിനാഥ ശാസ്ത്രികളെന്ന് ഹൈക്കോടതി ജഡ്ജി ജസ്റ്റിസ് എസ്. ഈശ്വരന്. നവതി ആഘോഷങ്ങളോടുനുബന്ധിച്ച് കെ.വി. ശേഷാദ്രിനാഥ ശാസ്ത്രികള്ക്ക് കാലടി നാസ് ഓഡിറ്റോറിയത്തില് നല്കിയ പൗരസ്വീകരണം ഉദ്ഘാടനം നിര്വഹിക്കുകയായിരുന്നു അദ്ദേഹം. മംഗളവാദ്യത്തോടെയും വേദഘോഷത്തോടും കെ.വി. ശേഷാദ്രിനാഥ ശാസ്ത്രികള് താമസിക്കുന്ന ശ്രീശങ്കരനിലയത്തില് നിന്നും സ്വീകരിച്ചു പൂര്ണ്ണകുംഭം നല്കി വേദിയിലേക്കാനയിച്ചു. ശങ്കരനിലയം മാനേജിങ് ട്രസ്റ്റി പി. വീരരാഘവന് അധ്യക്ഷനായി.
കാലടി അദൈ്വതാശ്രമത്തിലെ സ്വാമി കൃതജ്ഞാനന്ദ, ശ്രീരാമകൃഷ്ണ പരമഹംസരുടെ സേവനതയും, ശാസ്ത്രികളുടെ സേവന രീതിയും താരതമ്യം ചെയ്തു.
കേരള ബ്രാഹ്മണസഭ മധ്യമേഖലാധ്യക്ഷന് അനന്ത സുബ്രഹ്മണ്യന് ശാസത്രികളെ സദസിന് പരിചയപ്പെടുത്തി. ധര്മ്മശ്രഷ്ടദ്രാവിഡ് ഘന പാഠികള് മംഗളപത്രം വായിച്ചു. മനസ്സിനെ നിയന്ത്രിച്ച് സുഖവും സന്തോഷവും കൈവരിക്കാന് ശാസ്ത്രികള് മറുപടി പ്രസംഗത്തില് ആഹ്വാനം ചെയ്തു.
ചടങ്ങില് കാലടി പഞ്ചായത്ത് പ്രസിഡന്റ ഷൈജന് തോട്ടപ്പള്ളി, പി. രംഗദാസ പ്രഭു, ആദിശങ്കര ജന്മഭൂമി ക്ഷേത്രം മാനേജര് പ്രൊഫ.എ. സുബ്രമണ്യ അയ്യര്, കാലടി കൃഷ്ണന്, എന്.ആര്. പരമേശ്വരന്, കരിമ്പുഴ രാമന് എന്നിവര് സംസാരിച്ചു.
