ഗാസിയാബാദ്: റിയല്‍ എസ്റ്റേറ്റ് ഇടപാടുകാരനൊപ്പം ഇന്‍സ്റ്റഗ്രാം റീല്‍ ചിത്രീകരിച്ച രണ്ട് പോലീസുകാരെ സസ്പെന്‍ഡ് ചെയ്തു. ഉത്തര്‍പ്രദേശിലെ ഗാസിയാബാദ് ജില്ലയിലാണ് സംഭവം. അങ്കുര്‍വിഹാര്‍ പോലീസ് സ്റ്റേഷനിലെ സബ് ഇന്‍സ്പെക്ടര്‍മാരായ ധര്‍മ്മേന്ദ്ര ശര്‍മ്മ, റിതേഷ് കുമാര്‍ എന്നിവര്‍ക്കാണ് സസ്പെന്‍ഷന്‍.
ഗാസിയാബാദ് ജില്ലയിലെ ലോണി സര്‍ക്കിളിലുള്ള ട്രോണിക്ക സിറ്റിയിലെ റിയല്‍ എസ്റ്റേറ്റ് ഇടപാടുകാരനായ സര്‍താസിനൊപ്പമാണ് പോലീസുകാര്‍ റീല്‍സ് ചിത്രീകരിച്ചത്. ഇയാളുടെ ഓഫീസ് പരിസരത്തുവെച്ചായിരുന്നു ചിത്രീകരണം. റീല്‍സ് ചിത്രീകരിക്കാനായാണ് പോലീസുകാര്‍ സര്‍താസിന്റെ ഓഫീസിലേക്ക് പോയതെന്നാണ് വിവരം.
രണ്ട് പോലീസുകാര്‍ക്കും സര്‍താസ് ഹസ്തദാനം നല്കുന്നതും അവര്‍ക്കൊപ്പം നടന്നുനീങ്ങുന്നതുമാണ് റീല്‍ വീഡിയോയിലുള്ളത്. സര്‍താസിന്റെ സുരക്ഷാ ഉദ്യോഗസ്ഥരെ പോലെയാണ് പോലീസുകാര്‍ റീല്‍ വീഡിയോയില്‍ അഭിനയിച്ചിരിക്കുന്നത്. ഹൈവേയുടെ നടുവില്‍ നിര്‍ത്തിയിട്ട രണ്ട് എസ്‌യുവികളുടെ പശ്ചാത്തലത്തില്‍ ഇവര്‍ നടക്കുന്നത് റീലില്‍ കാണാം.
രണ്ട് പോലീസുകാരേയും സസ്പെന്‍ഡ് ചെയ്തുവെന്ന് ഗാസിയാബാദ് റൂറല്‍ ഡെപ്യൂട്ടി കമ്മിഷണന്‍ വിവേക് ചന്ദ് യാദവ് പറഞ്ഞു. പോലീസ് ചട്ടങ്ങള്‍ ലംഘിച്ചതിനാണ് ഇവരെ സസ്പെന്‍ഡ് ചെയ്തത്. ഇവര്‍ക്കെതിരെ വകുപ്പുതല അന്വേഷണവും ആരംഭിച്ചിട്ടുണ്ടെന്നും അദ്ദേഹം പറഞ്ഞു. പോലീസുകാര്‍ക്കൊപ്പം റീല്‍ ചിത്രീകരിച്ച സര്‍താസിനെ അറസ്റ്റ് ചെയ്തുവെന്നും ഡെപ്യൂട്ടി കമ്മിഷണര്‍ പറഞ്ഞു. ഭാരതീയ ന്യായ സംഹിതയിലെ 351-ാം വകുപ്പ് പ്രകാരം ഇയാള്‍ക്കെതിരെ എഫ്‌ഐആര്‍ രജിസ്റ്റര്‍ ചെയ്തുവെന്നും വിവേക് ചന്ദ് യാദവ് കൂട്ടിച്ചേര്‍ത്തു.
