തിരുവനന്തപുരം: കാര്യവട്ടം ക്യാമ്പസിലെ ഇടിമുറിയില്‍ കെ എസ് യു
നേതാവ് സാന്‍ജോസിനെ മര്‍ദ്ദിച്ചെന്ന ആരോപണം തെറ്റെന്ന് സര്‍വകലാശാല സമിതിയുടെ അന്വേഷണ റിപ്പോര്‍ട്ട്. വിസിയുടെ നിര്‍ദ്ദേശ പ്രകാരം രജിസ്ട്രാര്‍ നിയമിച്ച സമിതിയുടെ റിപ്പോര്‍ട്ടിലാണ് ഇടിമുറി മര്‍ദ്ദനമെന്ന ആരോപണം വ്യാജമെന്ന് പറയുന്നത്.
കാര്യവട്ടം ക്യാമ്പസിലെ ആണ്‍കുട്ടികളുടെ ഹോസ്റ്റലിലെ 121ാം നമ്പര്‍ മുറി ഒരു റിസര്‍ച്ച് സ്‌കോളര്‍ക്ക് അനുവദിച്ചിട്ടുളളതാണ്. ഈ വിദ്യാര്‍ത്ഥി സംഭവം നടന്നതിന്റെ തലേദിവസം ഇവിടെ നിന്ന് പോയിരുന്നു. സംഘര്‍ഷം നടന്ന ദിവസം ഈ മുറി അടഞ്ഞുകിടക്കുകയായിരുന്നു. ഈ സാഹചര്യത്തില്‍ ഈ മുറിയിലിട്ട് മര്‍ദ്ദിച്ചെന്നത് ശരിയല്ലെന്നാണ് റിപ്പോര്‍ട്ട്.
വിദ്യാര്‍ത്ഥിനിയായ സഹോദരിയെ ക്യാമ്പസില്‍ എത്തിക്കാന്‍ വന്ന ജോഫിന്‍ ക്യാമ്പസില്‍ പ്രവേശിച്ചതിനെ ചൊല്ലിയാണ് സംഘര്‍ഷം തുടങ്ങിയതെന്ന് റിപ്പോര്‍ട്ടില്‍ പറയുന്നു. ജോഫിനും സഹോദരിയും സാന്‍ജോസും ഒരു ബൈക്കിലാണ് ക്യാമ്പസില്‍ എത്തിയത്.
എന്നാല്‍ ക്യാമ്പസില്‍ നിന്ന് മടങ്ങുമ്പോള്‍ മെന്‍സ് ഹോസ്റ്റലിന് സമീപം ഇവിടെ വിദ്യാര്‍ത്ഥിയല്ലാത്ത ജോഫിനെ എസ്എഫ്ഐ പ്രവര്‍ത്തകര്‍ തടഞ്ഞു. ബൈക്കിന്റെ താക്കോല്‍ ഊരിയെടുത്തു. ഇതറിഞ്ഞ് സാന്‍ജോസ് സ്ഥലത്ത് എത്തി. പിന്നീട് ഇരു ഭാഗത്തും കൂടുതല്‍ പേരെത്തി. തര്‍ക്കം സംഘര്‍ഷത്തില്‍ കലാശിക്കുകയായിരുന്നു. കെഎസ്യു നേതാവ് സാന്‍ജോസിനും എസ്എഫ്ഐ പ്രവര്‍ത്തകന്‍ അഭിജിത്തിനും സംഘര്‍ഷത്തില്‍ പരിക്കേറ്റു. നവാഗതരെ സ്വീകരിക്കുന്നതിന് തോരണം കെട്ടുന്നതുമായി ബന്ധപ്പെട്ട് നേരത്തേ ഇരു വിഭാഗവും തമ്മില്‍ തര്‍ക്കം ഉണ്ടായിരുന്നുവെന്നും നവഗാതരെ സ്വീകരിക്കുന്നതിന് പ്രോട്ടോക്കോള്‍ ഉണ്ടാക്കണമെന്നും സമിതി നിര്‍ദ്ദേശിച്ചിട്ടുണ്ട്.
അതേസമയം അന്വേഷണ സമിതി റിപ്പോര്‍ട്ട് കെ.എസ്.യു തള്ളി. എസ്.എഫ്.ഐയെ എക്കാലത്തും സംരക്ഷിക്കുന്ന സമിതി അംഗങ്ങളില്‍ നിന്നും ഇത്തരത്തില്‍ ഒരു റിപ്പോര്‍ട്ട് വന്നില്ലെങ്കിലേ അത്ഭുതം ഉള്ളൂവെന്ന് സംഘടന പ്രതികരിച്ചു.
പ്രതികരിക്കാൻ ഇവിടെ എഴുതുക: