ലഖ്നൗ: ഉത്തര്‍പ്രദേശിലെ ഹാത്റസിലെ സത്സംഗിനിടയില്‍ തിക്കിലും തിരക്കിലും പെട്ട് 120 പേര്‍ കൊല്ലപ്പെട്ട സംഭവത്തിന് പിന്നാലെ സമാജ് വാദി പാര്‍ട്ടി നേതാവ് അഖിലേഷ് യാദവ് ഒരു വര്‍ഷം മുന്‍പ് ഇതേ സത്സംഗവേദി സന്ദര്‍ശിച്ച് നടത്തിയ പഴയ ട്വീറ്റ് വൈറലായി പ്രചരിക്കുന്നു. “നാരായണ്‍ സാകര്‍ ഹരി എന്നെന്നേയ്ക്കുമായി പ്രകീര്ത്തിക്കപ്പെട്ടേയ്ക്കും” എന്ന അഖിലേഷ് യാദവിന്റെ പഴയ ട്വീറ്റ് അറംപറ്റിയതുപോലെയുള്ള വാക്കുകളായി മാറി.
ഭോലെ ബാബ എന്ന് വിളിക്കുന്ന നാരായണ്‍ സാകര്‍ ഹരിയുടെ സത്സംഗ് വേദിയില്‍ 2023 ജനവരി 3ന് നടത്തിയ സന്ദര്‍ശനത്തിന് ശേഷമായിരുന്നു അഖിലേഷ് യാദവ് ട്വീറ്റ് അന്ന് എക്സില്‍ പങ്കുവെച്ചത്.
അന്ന് സത്സംഗവേദി സന്ദര്‍ശിച്ച അഖിലേഷ് യാദവ് ഭോലെ ബാബയെ പുകഴ്‌ത്തി പ്രസംഗിച്ചിരുന്നു. അതിന് ശേഷമാണ് ചിത്രങ്ങളെല്ലാം ഉള്‍പ്പെടുത്തി ട്വീറ്റ് പങ്കുവെച്ചത്. ”
അഖിലേഷ് യാദവ് എക്സില്‍ പങ്കുവെച്ച സന്ദേശം
നാരായണ്‍ സാകര്‍ ഹരിയുടെ സത്സംഗ വേദയില്‍ 120ല്‍പരം ആളുകള്‍ (അധികവും സ്ത്രീകളും കുട്ടികളുമാണ്) ഉന്തിലും തള്ളിലുംപെട്ട് മരണമടഞ്ഞതോടെ അഖിലേഷ് യാദവിന്റെ ഈ സന്ദേശം വൈറലായി പ്രചരിക്കുകയാണ്.
സത്സംഗവേദിയില്‍ ശ്വാസംമുട്ടല്‍ അനുഭവപ്പെട്ടതിനെ തുടര്‍ന്ന് ചിലര്‍ വേദിയില്‍ നിന്നും പുറത്തേക്ക് ഓടിയതാണ് ഉന്തിനും തള്ളിനും കാരണമായത്. സത്സംഗത്തിനിടയില്‍ ഭക്തരായ ജനങ്ങള്‍ ബാബയുടെ പാദത്തിലെ മണ്ണ് എടുത്ത് പോകുന്നതിനിടയിലാണ് പൊടുന്നനെ തിക്കും തിരക്കും ഉണ്ടായത്.
വിശദമായി അന്വേഷിക്കാന്‍ പ്രത്യേക അന്വേഷണ സംഘത്തെ രൂപീകരിച്ചിട്ടുണ്ട്. സംഭവത്തിന് പിന്നില്‍ അട്ടിമറിയുണ്ടോ എന്നും പരിശോധിക്കും.
മരണസംഖ്യ ഇനിയും കൂടാന്‍ സാധ്യതയുണ്ട്. സംഭവത്തില്‍ മുഖ്യമന്ത്രി യോഗി ആദിത്യനാഥ് ദുഖം പങ്കുവെച്ചു.
പ്രതികരിക്കാൻ ഇവിടെ എഴുതുക: