ആലപ്പുഴ: മാന്നാറില് നിന്ന് 15 വര്ഷം മുമ്പ് കാണാതായ കലയുടെ മൃതദേഹവശിഷ്ടങ്ങള് എന്ന് സംശയിക്കുന്ന വസ്തുക്കള് മാന്നാറിലെ വീടിന്റെ സെപ്റ്റിക് ടാങ്കില് നിന്ന് ലഭിച്ചു. എന്നാല് ഇത് മൃതദേഹത്തിന്റെ ഭാഗമാണോയെന്ന് കൂടുതല് പരിശോധനയിലൂടെ മാത്രമേ വ്യക്തമാകൂ . രണ്ടാമത്തെ സെപടിക് ടാങ്കും തുറന്നുളള പരിശോധന തുടരുകയാണ്.
സംഭവത്തില് ഭര്ത്താവ് അനിലിനും പങ്കുള്ളതായാണ് പൊലീസ് സംശയിക്കുന്നത്. കസ്റ്റഡിയിലുള്ള അനിലിന്റെ ബന്ധുക്കളായ നാല് പ്രതികളും കുറ്റം സമ്മതിച്ചിട്ടില്ല. നാല് പേരും പരസ്പര ബന്ധമില്ലാത്ത മൊഴികളാണ് നല്കുന്നത്.
കലയെ കാണാതായപ്പോള് മാതാപിതാക്കളും പരാതി നല്കിയിരുന്നില്ല. കല കൊച്ചിയില് ജോലിക്ക് പോയി എന്ന നിഗമനത്തില് ആയിരുന്നു കുടുംബം.
സുരേഷ്, ജിനു, പ്രമോദ്, സന്തോഷ് എന്നിവരാണ് കേസില് പൊലീസ് കസ്റ്റഡിയിലുള്ളത്. കല മറ്റൊരാള്ക്കൊപ്പം പോയെന്നായിരുന്നു കാണാതായ ശേഷം ഭര്ത്താവ് അനിലും പറഞ്ഞിരുന്നത്. ഇസ്രയേലില് ജോലി ചെയ്യുന്ന അനിലിനോട് എത്രയും വേഗം നാട്ടിലെത്താന് പൊലീസ് ആവശ്യപ്പെട്ടുണ്ട്.
ഇരു സമുദായങ്ങളില് പെട്ട അനിലും കലയും പ്രണയിച്ചാണ് വിവാഹം കഴിച്ചത്. വീട്ടുകാരുടെ എതിര്പ്പ് മറികടന്നായിരുന്നു വിവാഹം. ഇതോടെ കലയുടെ ബന്ധുക്കള് ഇവരുമായി അകന്നു. പിന്നീട് കലയെ കാണാതായപ്പോള്, മക്കളെയും തന്നെയും ഉപേക്ഷിച്ച് യുവതി മറ്റൊരാള്ക്കൊപ്പം പോയെന്നാണ് ഭര്ത്താവ് അനില് പറഞ്ഞത്.
പിന്നീട് അനിലിന്റെ മാന്നാറിലെ വീട് പുതുക്കി നിര്മ്മിച്ചു. പുനര് വിവാഹിതനായ അനില് ഇസ്രയേലില് പോയി.
സംഭവത്തില് നിര്ണായക വഴിത്തിരിവുണ്ടായത് രണ്ട് മാസം മുമ്പാണ്. ഭാര്യയെ മണ്ണെണ്ണ ഒഴിച്ച് തീ കൊളുത്താന് ശ്രമിച്ച കേസില് പ്രമോദ് പിടിയിലായി. ഇതേ കുറിച്ച് അന്വേഷണത്തിനിടെ കലയുടെ തിരോധാനത്തെ കുറിച്ചും വിവരം കിട്ടി. പൊലീസ് അന്വേഷണം തുടരവെ അമ്പലപ്പുഴ സ്റ്റേഷനില് ഊമക്കത്ത് ലഭിച്ചു. ഇതോടെ പ്രമോദിനെയും സുഹൃത്തുക്കളെയും പൊലീസ് തുടര്ച്ചയായി നിരീക്ഷിച്ചു വന്നു. കൊലപാതകമെന്ന സംശയം ബലപ്പെട്ടപ്പോഴാണ് നാല് പേരെയും കസ്റ്റഡിയിലെടുത്തത്.
