കോഴിക്കോട്: കാലിക്കറ്റ് സര്വകലാശാലാ സിന്ഡിക്കേറ്റ് തെരഞ്ഞെടുപ്പ് സംബന്ധിച്ച് വൈസ് ചാന്സലര് ഇന്നു നടത്താന് തീരുമാനിച്ച ഹിയറിങ് നിയമവിരുദ്ധമാണെന്ന പരാതിയുമായി സിന്ഡിക്കേറ്റ് അംഗം എ.കെ. അനുരാജ് ചാന്സലറായ ഗവര്ണര് ആരിഫ് മുഹമ്മദ് ഖാനെ സമീപിച്ചു.
വൈസ് ചാന്സലര് തന്റെ അധികാരപരിധിക്കപ്പുറത്തുള്ള പ്രവര്ത്തനം നടത്തുകയാണെന്ന് പരാതിയില് ചൂണ്ടിക്കാട്ടി. സിന്ഡിക്കേറ്റ് തെരഞ്ഞെടുപ്പു സംബന്ധിച്ച നടപടിക്രമങ്ങള് പൂര്ത്തിയാക്കി വിജയികളുടെ പേരുവിവരം വ്യക്തമാക്കി വിജ്ഞാപനം പുറത്തിറക്കിയതാണ്. തെരഞ്ഞെടുക്കപ്പെട്ട സിന്ഡിക്കേറ്റ് അംഗങ്ങളെ സര്വകലാശാലാ പ്രവര്ത്തനങ്ങളില് ഉള്പ്പെടുത്തുകയും ചെയ്തു. അതിലേറെ, ഇന്നേക്ക് നിശ്ചയിച്ചിരിക്കുന്ന ഹിയറിങ് യൂണിവേഴ്സിറ്റി സ്റ്റാറ്റിയൂട്ടിനും നിയമത്തിനും എതിരാണ്.
നിലവിലുള്ള വൈസ് ചാന്സലറും രജിസ്ട്രാറും മറ്റും രാഷ്ട്രീയ സമ്മര്ദങ്ങള്ക്കു വിധേയമായി സര്വകലാശാലാ താല്പര്യം മറന്നു തീരുമാനങ്ങള് കൈക്കൊള്ളുന്ന സ്ഥിതി ഇതിനുമുന്പു പലപ്പോഴും ഉണ്ടായിട്ടുണ്ട്. അതിനാല്ത്തന്നെ പക്ഷപാതപരമായ തീരുമാനം കൈക്കൊള്ളാന് വിസി തയ്യാറായേക്കുമെന്ന് ആശങ്കപ്പെടുന്നു. ഈ സാഹചര്യത്തില് ഹിയറിങ് റദ്ദാക്കാന് നിര്ദേശം നല്കണമെന്നാണ് പരാതിയില് ആവശ്യപ്പെട്ടിരിക്കുന്നത്.
പുതിയതായി ഒരു പരാതിയും ഉയര്ന്നുവന്നിട്ടില്ല എന്നിരിക്കെ ധൃതിപിടിച്ചു നടത്തുന്ന ഹിയറിങ് സംശയാസ്പദമാണെന്ന് അനുരാജ് പറഞ്ഞു. വിസി പദവിയിലെ ടേം കഴിയാന് ഏതാനും ദിവസങ്ങള് മാത്രം ബാക്കിയിരിക്കെയാണ് പ്രൊഫ. ഡോ. എം.കെ. ജയരാജ് ഹിയറിങ് നടത്താന് തീരുമാനിച്ചിരിക്കുന്നത്. കൗണ്ടിങ് വേളയില് ഉയര്ത്തിയതും അവിടെവെച്ചുതന്നെ അധികൃതര് തീര്പ്പാക്കുകയും ചെയ്ത പരാതിയുമായാണ് രണ്ടു സ്ഥാനാര്ത്ഥികള് വീണ്ടും രംഗത്തെത്തിയിരിക്കുന്നത്.
പ്രഥമദൃഷ്ട്യാ തള്ളിക്കളയേണ്ട ഈ പരാതികള് ഗൗരവത്തിലെടുത്ത് നടപടികളിലേക്കു കടക്കുകയാണ് സര്വകലാശാലാ അധികൃതര് ചെയ്തിട്ടുള്ളത്. അക്കാദമിക മികവിനാ
യി പ്രയത്നിക്കേണ്ട സിന്ഡിക്കേറ്റ്, സെനറ്റ് അംഗങ്ങളുടെ ശ്രദ്ധ അനാവശ്യ കാര്യങ്ങളിലേക്കു തിരിച്ചുവിടാന് വൈസ് ചാന്സലര് തന്നെ മുന്നിട്ടിറങ്ങുന്ന നിര്ഭാഗ്യകരമായ സംഭവമാണ് ഇന്നത്തെ ഹിയറിങ്ങെന്നും അനുരാജ് പറഞ്ഞു.
