കണ്ണൂർ പാപ്പിനിശ്ശേരിയിലെ അയ്ഷ ഗോൾഡിന്റെ ഉടമ അഷ്റഫ് മരിച്ചതോടെ ഈ ജ്വല്ലറിയില് വിശ്വസിച്ച് പണം മുടക്കിയ 2000 പേര് പെരുവഴിയിലായി. ഏകദേശം 60 കോടിയോളം രൂപയാണ് ഇവര് നിക്ഷേപിച്ചത്. ഉടമ അഷ്റഫ് ഉണ്ടായിരുന്ന കാലത്ത് ഒരു ലക്ഷത്തിന് 900 രൂപ വെച്ച് ലാഭവിഹിതം 2020 വരെ നല്കിയിരുന്നു. പിന്നീട് അത് നിലച്ചു. അഷ്റഫ് മരണപ്പെട്ടതോടെ സ്വത്തുക്കള് വിറ്റ് കിട്ടുന്ന പണം നിക്ഷേപകര്ക്ക് നല്കാമെന്ന് മക്കളും മറ്റ് ഉടമുകളും പറഞ്ഞെങ്കിലും അവര് വാക്ക് പാലിക്കുന്നില്ല. ഇതോടെ നിക്ഷേപകര് നിയമനടപടിയ്ക്കൊരുങ്ങുന്നു.
പത്തിലധികം ഷോറൂമുകളുണ്ടായിരുന്ന സ്ഥാപനമാണ് പാപ്പിനിശ്ശേരിയിലെ അയ്ഷ ഗോൾഡ്. രണ്ടായിരത്തോളം പേരിൽ നിന്ന് പണവും സ്വർണവും നിക്ഷേപമായി വാങ്ങി. 2020 വരെ വാഗ്ദാനം ചെയ്ത തുക പ്രതിമാസം നിക്ഷേപകർക്ക് നൽകിയിരുന്നു. എന്നാൽ ഉടമ അഷ്റഫിന്റെ മരണത്തോടെ സ്ഥാപനം തകർന്നു. നിക്ഷേപകർക്ക് പിന്നീട് പണം കിട്ടാതായി.
സാധാരണക്കാർ മുതൽ വലിയ സാമ്പത്തിക നിലയുള്ളവരിൽ നിന്നുവരെ നിക്ഷേപം സ്വീകരിച്ചിരുന്നതായും ഒരു ലക്ഷം രൂപയ്ക്ക് മാസത്തിൽ 900 രൂപ വീതമാണ് ലാഭവിഹിതം നൽകിയിരുന്നതെന്നും നിക്ഷേപകരിലൊരാളായ സമീറ പറഞ്ഞു. സ്വത്തുവകകൾ വിറ്റ് പണവും സ്വർണവും തിരികെ നൽകാമെന്ന ഉറപ്പുകൾ നടപ്പായില്ല. വഞ്ചിക്കപ്പെട്ടവർ കൂട്ടായ്മകളുണ്ടാക്കി. അതിന്റെ നേതൃത്വത്തിലുളളവരും കബളിപ്പിച്ചെന്നാരോപിച്ചാണ് ഒരു വിഭാഗം സമരം തുടങ്ങിയത്.
ഏതാനും പേർ കേസിന് പോയിരുന്നുവെന്നും എന്നാൽ കേസിന് പോയാൽ വസ്തുക്കൾ വിൽക്കാൻ തീരെ സാധിക്കില്ലെന്ന് കമ്മിറ്റിക്കാർ മറ്റുള്ളവരെ പറഞ്ഞ് വിശ്വസിപ്പിച്ചതെന്നും അതുകൊണ്ടുതന്നെ നിക്ഷേപർക്ക് കേസിന് പോകാനും പരാതിപ്പെടാനും ഭയമുണ്ടെന്നും പൊതുപ്രവർത്തകയായ സാജിദ പറയുന്നു. അഷ്റഫിന്റെ മകൻ ഉൾപ്പെടെയുളളവരാണ് നിലവിൽ സ്ഥാപന ഉടമകൾ.
