തിരുവനന്തപുരം: എസ്എസ്എല്സി കഴിഞ്ഞ് ഉപരിപഠനത്തിന് യോഗ്യത നേടുന്നവര്ക്ക് എഴുതാനും വായിക്കാനും അറിയില്ല എന്ന നിരീക്ഷണം വസ്തുതാവിരുദ്ധമെന്ന് പൊതു വിദ്യാഭസ വകുപ്പ് മന്ത്രി വി ശിവന്കുട്ടി. സംസ്ഥാനത്തെ സ്കൂള് വിദ്യാഭ്യാസ മേഖലയില് പഠനനിലവാരം കൂടുതല് മെച്ചമാക്കണം എന്നുള്ളത് പൊതുസമൂഹം ഉള്ക്കൊള്ളുന്ന ആവശ്യമാണ്. അതിനായി കൂടുതല് പദ്ധതികള് പൊതു വിദ്യാഭ്യാസ വകുപ്പിന് കീഴിലുള്ള എസ് സി ഇ ആര് ടി അടക്കമുള്ള വിദ്യാഭ്യാസ ഏജന്സികള് നടത്തുന്നുണ്ട്.
പ്രീപ്രൈമറി തലം മുതല് പാഠ്യപദ്ധതി പരിഷ്കരണം ഉള്പ്പെടെ കാര്യങ്ങള് നടപ്പാക്കി വരികയാണ്. അധ്യാപകര്ക്ക് സമയാസമയം പരിശീലനം ലഭ്യമാക്കുന്നു. നിര്മ്മിത ബുദ്ധി അടക്കമുള്ള നൂതന ശാസ്ത്ര, സാങ്കേതിക മേഖലകളില് അധ്യാപകര്ക്കും വിദ്യാര്ത്ഥികള്ക്കും പരിശീലനം നല്കുകയാണ്. ഒന്നാം ക്ലാസ് കടക്കുന്ന വിദ്യാര്ത്ഥി മലയാളം അക്ഷരമാല പഠിക്കുമെന്ന് ഉറപ്പാക്കുന്ന രീതിയിലുള്ള പാഠ്യപദ്ധതി പരിഷ്കരണ പ്രവര്ത്തനങ്ങളാണ് നിലവില് നടക്കുന്നത്.
പ്രീ പ്രൈമറി,പ്രൈമറി,അപ്പര് പ്രൈമറി, ഹൈസ്കൂള്,ഹയര് സെക്കന്ഡറി വിദ്യാഭ്യാസം രാജ്യത്ത് തന്നെ ഏറ്റവും മികച്ച രീതിയില് നടത്തുന്ന സംസ്ഥാനമാണ് കേരളം. അക്കാദമിക് മികവിന്റെ കാര്യത്തില് ഒരു വിട്ടുവീഴ്ചയും ചെയ്യില്ല. സ്കൂള് വിദ്യാഭ്യാസത്തിന്റെ അടക്കം കാര്യത്തില് കേന്ദ്ര വിദ്യാഭ്യാസമന്ത്രാലയത്തിന്റെ വികസന സൂചികകളില് കേരളം ഇപ്പോഴും പ്രഥമ ശ്രേണിയിലാണ്.
കേരളത്തില് എസ്എസ്എല്സി പാസായ പല കുട്ടികള്ക്കും എഴുത്തും വായനയും അറിയില്ലെന്ന് മന്ത്രി സജി ചെറിയാന് നേരത്തേ പറഞ്ഞിരുന്നു.
