തിരുവനന്തപുരം: പരിവര്ത്തിത ക്രൈസ്തവരെ പട്ടികജാതി ലിസ്റ്റില് ഉള്പ്പെടുത്താന് ശിപാര്ശ ചെയ്തെന്ന് നിയമസഭയില് പ്രസ്താവിച്ച മന്ത്രി ഒ.ആര്. കേളു പട്ടികജാതി വര്ഗ വഞ്ചകനാണെന്ന് പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട്.
കേരളത്തിലെ 40 ലക്ഷത്തോളം വരുന്ന പട്ടികജാതി, വര്ഗ വിഭാഗങ്ങളെ കേളു വഞ്ചിക്കുകയാണ്. അംബേദ്കര് ഭരണഘടനയില് രാഷ്ട്രീയ സംവരണം ഏര്പ്പെടുത്തിയത് കൊണ്ടുമാത്രം സംവരണ സീറ്റില് വിജയിച്ച് എംഎല്എയും മന്ത്രിയുമായ കേളു കേരളത്തിലെ പട്ടികജാതിക്കാരെ ഒറ്റിക്കൊടുക്കുകയാണ്.
പട്ടികവിഭാഗത്തിന്റെ ഭരണഘടനാപരമായ അവകാശങ്ങള് സംരക്ഷിക്കേണ്ട ബാധ്യതയുള്ള മന്ത്രി തന്നെ പട്ടികവിഭാഗങ്ങളുടെ അവകാശങ്ങള് കവര്ന്നെടുക്കാനും അട്ടിമറിക്കാനുമാണ് ശ്രമിക്കുന്നത്. പട്ടികജാതി സംവരണ ലിസ്റ്റില് പരിവര്ത്തിത ക്രിസ്ത്യാനികളെ ഉള്പ്പെടുത്താനുള്ള സംസ്ഥാന സര്ക്കാരിന്റെ ശുപാര്ശയും അതിന് പിന്തുണ കൊടുക്കുന്ന സിപിഎമ്മിന്റെയും കോണ്ഗ്രസിന്റെയും നടപടികളും കേരളത്തിലെ പട്ടികജാതി സമൂഹം തിരിച്ചറിയണമെന്നും ഷാജുമോന് പറഞ്ഞു.
