ലണ്ടന്‍: സീസണിലെ മൂന്നാം ഗ്രാന്‍ഡ് സ്ലാം ടെന്നിസ് ടൂര്‍ണമെന്റ് വിംബിള്‍ഡണിന് നാളെ തുടക്കം. ഭാരതത്തിന്റെ പുരുഷ സിംഗിള്‍സ് താരം സുമിത് നാഗല്‍ നാളെ ആദ്യറൗണ്ടില്‍ കളിക്കാനിറങ്ങും.
ലോക ടെന്നിസ് റാങ്കിങ്ങില്‍ 71-ാം സ്ഥാനത്തുള്ള സുമിത്തിന്റെ എതിരാളി 135-ാം റാങ്കുകാരനായ സെര്‍ബിയയുടെ മിയോമിര്‍ കെക്‌നോവിച്ച് ആണ്. ഓസ്‌ട്രേലിയന്‍ ഓപ്പണിന്റെ ആദ്യ റൗണ്ടില്‍ സീഡഡ് താരത്തെ അട്ടിമറിച്ച് സുമിത് നാഗല്‍ കരുത്തറിയിച്ചിരുന്നു. അതിന് ശേഷം പുല്‍ത്തകിടിയിലെ പിച്ചില്‍ ആദ്യമായെത്തുന്ന ഗ്രാന്‍ഡ് സ്ലാം ആണ് നാളത്തേത്.
വനിതാ സിംഗിള്‍സില്‍ ആദ്യ ദിവസമായ നാളെ സീഡഡ് താരങ്ങളായ ഒണ്‍സ് ജാബിയര്‍, അരൈന സബലെങ്ക, എലേന റൈബാക്കിന, കോകോ ഗൗഫ്, മാര്‍കെറ്റ വോണ്ട്രുസോവ, എന്നിവര്‍ ആദ്യ റൗണ്ട് മത്സരങ്ങള്‍ക്കിറങ്ങും. മാര്‍കെറ്റ വോന്‍ഡ്രുസോവ ആണ് നിലവിലെ ചാമ്പ്യന്‍. പുരുഷ സിംഗിള്‍സില്‍ അലെക്‌സാണ്ടര്‍ സ്വരേവും സ്റ്റെഫാനോസ് സിറ്റ്‌സിപ്പാസും അടക്കമുള്ള താരങ്ങള്‍ നാളെ ആദ്യ റൗണ്ടിനിറങ്ങും. നിലവിലെ ജേതാവ് കാര്‍ലോസ് അല്‍കാരസും ഓസ്‌ട്രേലിയന്‍ ഓപ്പണ്‍ ജേതാവ് യാനിക് സിന്നറും നാളെ ആദ്യ മത്സരത്തിനിറങ്ങും.
പ്രതികരിക്കാൻ ഇവിടെ എഴുതുക