കൊച്ചി: നോര്വേ ആസ്ഥാനമായിട്ടുള്ള വില്സണ് എഎസ്എയില് നിന്നും എട്ട് 6300 ടിഡിഡബ്ല്യു ഡ്രൈ കാര്ഗോ വെസലുകള്ക്കുള്ള ഫോളോ അപ്പ് ഓര്ഡര് കരസ്ഥമാക്കി കൊച്ചിന് ഷിപ്യാര്ഡ് ലിമിറ്റഡിന്റെ പൂര്ണ ഉടമസ്ഥതയിലുള്ള ഉഡുപ്പി കൊച്ചിന് ഷിപ്യാര്ഡ് ലിമിറ്റഡ് കപ്പല് നിര്മാണ വിപണിയില് മുന്നേറുന്നു.
ഉടുപ്പി കൊച്ചിന് ഷിപ്യാര്ഡ് ലിമിറ്റഡ് നോര്വേയിലെ വില്സണ് എഎസ്എ, യില് നിന്ന് നാലു യാനങ്ങള് രൂപകല്പനചെയ്ത് നിര്മിക്കുന്നതിനുള്ള അന്താരാഷ്ട്ര കരാര് നേടി. 6300 ടിഡിഡബ്ല്യു ഡ്രൈ കാര്ഗോ വെസലുകള് നിര്മിക്കുന്നതിനുള്ള കരാര് ആണ് കപ്പല് ശാല കരസ്ഥമാക്കിയത്. ആറ് 3800 ടിഡിഡബ്ല്യൂ ഡ്രൈ കാര്ഗോയുടെ രൂപകല്പ്പനയ്ക്കും നിര്മാണത്തിനുമായി 2023 ജൂണില് ലഭിച്ച കരാറിന്റെ നിര്വഹണ മികവിന്റെ തുടര് നടപടിയായിട്ടാണ് പുതിയ കരാര് ലഭിച്ചിരിക്കുന്നത്. ഈ യാനങ്ങളുടെ നിര്മാണം കര്ണാടകയിലെ ഉഡുപ്പിയിലുള്ള യാര്ഡില് ഇപ്പോള് പുരോഗമിക്കുന്നു. സപതംബര് 19നകം ഔപചാരികമായി കരാറില് ഒപ്പു വയ്ക്കും.
സമാന തരത്തിലുള്ള നാലു കപ്പലുകള് നിര്മിക്കുന്നതിനുള്ള തുടര് കരാറിനുള്ള വ്യവസ്ഥയും നിലവിലെ കരാറില് ഉണ്ട്. 100 മീറ്റര് നീളമുള്ള കപ്പലിന് 6.5 മീറ്റര് ഡിസൈന് ഡ്രാഫ്റ്റില് 6300 മെട്രിക് ടണ് ഭാരം ഉണ്ട്.
നെതര്ലാന്ഡിലെ കൊനോഷിപ്പ് ഇന്റര്നാഷണല് ആണ് കപ്പലുകള് രൂപകല്പ്പന ചെയ്തിരിക്കുന്നത്, കൂടാതെ യൂറോപ്പിലെ തീരക്കടലില് പൊതു ചരക്ക് ഗതാഗതത്തിനായി പരിസ്ഥിതി സൗഹൃദ ഡീസല് ഇലക്ട്രിക് യാനങ്ങള് നിര്മിക്കുക എന്ന പദ്ധതിയുടെ ഭാഗമായി കപ്പല് ശാലയെ തിരഞ്ഞെടുത്തിരിക്കുന്നത് രാജ്യത്തിന് അഭിമാനിക്കാവുന്ന നേട്ടമാണ്. 8 കപ്പലുകളുടെ മൊത്തത്തിലുള്ള പ്രോജക്ടിന് ഏകദേശം 1,100 കോടി രൂപയാണ് മൂല്യം. 2028 സപ്തംബറിനകം നിര്മാണം പൂര്ത്തിയായി യാനങ്ങള് കൈമാറ്റം ചെയ്യാന് കഴിയും.
