തിരുവനന്തപുരം: സംസ്ഥാനത്ത് മഴ ശക്തമാകുമെന്ന് കാലാവസ്ഥാ വകുപ്പ്. വരും മണിക്കൂറുകളില് എല്ലാ ജില്ലകളിലും കനത്ത മഴയ്ക്ക് സാധ്യത.
പത്തനംതിട്ട, ഇടുക്കി, കണ്ണൂര് ജില്ലകളില് ഓറഞ്ച് ജാഗ്രത പ്രഖ്യാപിച്ചു. ഒറ്റപ്പെട്ടയിടങ്ങളില് ഇടിമിന്നലോടു കൂടിയ മഴയ്ക്ക് സാധ്യതയുള്ളതിനാല് ജാഗ്രതാ നിര്ദേശങ്ങള് പുറപ്പെടുവിപ്പിച്ചു.
അതേസമയം, കനത്ത മഴ തുടരുന്ന സാഹചര്യത്തില് ഇടുക്കി ജില്ലയില് രാത്രി യാത്ര നിരോധിച്ചു. ജില്ലാ കളക്ടര് ഷീബ ജോര്ജ് ആണ് ഉത്തരവിട്ടത്. ഇന്ന് രാത്രി 7 മുതല് നാളെ രാവിലെ 6 വരെയാണ് നിരോധനം. മണ്ണിടിച്ചില് ഭീഷണി ശക്തമായി നിലനില്ക്കുന്ന സാഹചര്യത്തില് ജനങ്ങള് അതീവ ജാഗ്രത പുലര്ത്തണമെന്ന് കളക്ടര് അറിയിച്ചു.
സംസ്ഥാനത്ത് മഴ രണ്ടുദിവസം കൂടി തുടരുമെന്നും കാലാവസ്ഥ കേന്ദ്രത്തിന്റെ മുന്നറിയിപ്പില് പറയുന്നു.
കേരളാ തീരത്തും തമിഴ്നാട് തീരത്തും ചൊവ്വാഴ്ച രാത്രി 11.30 വരെ കള്ളക്കടല് പ്രതിഭാസത്തിനും ഉയര്ന്ന തിരമാലയ്ക്കും സാധ്യതയുള്ളതിനാല് മത്സ്യത്തൊഴിലാളികള് ജാഗ്രത പാലിക്കണമെന്നും നിര്ദേശമുണ്ട്.
