തിരുവനന്തപുരം: മുന് മന്ത്രിയും നിയുക്ത എംപിയുമായ കെ.രാധാകൃഷ്ണനെ ആലിംഗനം ചെയ്തതില് ജാതി ചിന്ത കലര്ത്തിയത് വേദനിപ്പിച്ചെന്ന് രാജ്യാന്തര തുറമുഖ കമ്പനി ഡയറക്ടര് ദിവ്യ.എസ്.അയ്യര്. സ്നേഹത്തിന് പ്രോട്ടോക്കോള് ഇല്ലെന്ന് അവര് പറഞ്ഞു.
ഹൃദയത്തിന്രെ ഭാഷയിലാണ് മുന് മന്ത്രി കെ രാധാകൃഷ്ണനെ ആലിംഗനം ചെയ്തത്. അതില് ജാതീയ ചിന്ത കലര്ത്തിയത് വേദനിപ്പിച്ചു. അപക്വ മനസിന് ഉടമകളായുള്ളവരാണ് അത്തരത്തില് ജാതീയ ചിന്തകള് കലര്ത്തിയത്.
പലരുടെയും അപക്വ ചിന്തകള് വിഷയം സങ്കീര്ണമാക്കി. ജാതീയ പരാമര്ശങ്ങള് വേദനിപ്പിച്ചു. ജീവിതത്തില് ഇന്ന് വരെ ജാതി നോക്കി ജീവിച്ചിട്ടില്ലെന്നും ദിവ്യ എസ് അയ്യര് വ്യക്തമാക്കി.
ലോക്സഭ തെരഞ്ഞെടുപ്പില് വിജയിച്ച മന്ത്രി കെ രാധാകൃഷ്ണന് മന്ത്രി സ്ഥാനം ഒഴിഞ്ഞപ്പോഴാണ് ദിവ്യ എസ് അയ്യര് സ്നേഹാദരത്തോടെ ആലിംഗനം ചെയ്തത്.ഇതിനെ ബ്രാഹ്മണ വനിത പട്ടിക ജാതിക്കാരനെ ആലിംഗനം ചെയ്യുന്നുവെന്ന രീതിയില് സി പി എം അനുഭാവികള് സൈബറിടങ്ങളില് പ്രചരിപ്പിച്ചിരുന്നു.
