കാസര്ഗോഡ്: പൊലീസ് ഉദ്യോഗസ്ഥരെയടക്കം നിരവധി യുവാക്കളെ പെണ്കെണിയില് പെടുത്തിയ മുപ്പത്തിയഞ്ചുകാരിക്കെതിരെ കേസ്. കാസര്ഗോഡ് കൊമ്പനടുക്കം സ്വദേശിനി ശ്രുതി ചന്ദ്രശേഖറിനെതിരെയാണ് പൊലീസ് കേസെടുത്തത്.
ഐഎസ്ആര്ഒയില് അസിസ്റ്റന്റ് എഞ്ചിനീയര് എന്ന വ്യാജേനയാണ് തട്ടിപ്പ് നടത്തിയത്. പുല്ലൂര് പെരിയ സ്വദേശി യുവാവിനെ മംഗലാപുരത്ത് പീഡനക്കേസ് നല്കി ജയിലിലാക്കിയതോടെയാണ് ശ്രുതി ചന്ദ്രശേഖറുടെ തട്ടിപ്പ് വിവരങ്ങള് പുറത്ത് വന്നത്. ഐ എസ് ആര് ഒയില് അസിസ്റ്റന്റ് എഞ്ചിനീയര്,ഐഎഎസ് വിദ്യാര്ത്ഥിനി എന്നിങ്ങനെ ചമഞ്ഞായിരുന്നു യുവാക്കളെ വിവാഹ വാഗ്ദാനം നല്കി വലയിലാക്കിയത്.
കാസര്ഗോഡ്, കണ്ണൂര്, കോഴിക്കോട്, തൃശൂര് ജില്ലകളിലെ പൊലീസ് ഉദ്യോഗസ്ഥരും യുവതിയുടെ തട്ടിപ്പിനിരയായി. തട്ടിപ്പ് വിവരം മനസിലാക്കിയിട്ടും മാനഹാനി ഉണ്ടാവുമെന്ന ആശങ്കയാല് പൊലീസുകാരില് പലരും വിവരം മറച്ചു വച്ചു.
പെരിയ സ്വദേശി യുവാവിന്റെ അമ്മയുടെ സ്വര്ണമാലയും ശ്രുതി ചന്ദ്രശേഖര് തട്ടിയെടുത്തു. ജയിലിലായ യുവാവില് നിന്ന് മാത്രം ശ്രുതി ചന്ദ്രശേഖരന് തട്ടിയെടുത്തത് അഞ്ചു ലക്ഷം രൂപയാണ്.
വ്യാജ തിരിച്ചറിയല് രേഖകള് കാട്ടി തട്ടിപ്പ് നടത്തിയ സംഭവത്തില് യുവതിയ്ക്കെതിരെ മേല്പ്പറമ്പ് പൊലീസ് ജാമ്യമില്ലാ വകുപ്പുകള് പ്രകാരം കേസെടുത്തു.
