കോട്ടയം: റബര്‍ക്കൃഷി വിപുലമാക്കാനുള്ള ‘ആത്മ’ പദ്ധതിയില്‍ കേരളത്തെയും ഉള്‍പ്പെടുത്തണമെന്ന് റബര്‍ ബോര്‍ഡ് എക്സിക്യൂട്ടീവ് അംഗം എന്‍. ഹരി ആവശ്യപ്പെട്ടു. പദ്ധതിയുടെ പത്തുശതമാനമെങ്കിലും കേരളത്തിലെ കൃഷി വ്യാപനത്തിന് വിനിയോഗിക്കണം. ഇക്കാര്യം കേന്ദ്ര സര്‍ക്കാരിന്റെ ശ്രദ്ധയില്‍ കൊണ്ടുവരണമെന്ന് റബര്‍ ബോര്‍ഡ് യോഗത്തില്‍ ഹരി ആവശ്യപ്പെട്ടു.
വടക്കുകിഴക്കന്‍ സംസ്ഥാനങ്ങളിലും ബംഗാളിലും റബര്‍ വ്യാപകമാക്കാനുളള 1,100 കോടിയുടെ പദ്ധതിയുടെ ഭാഗമായി 30 ശതമാനം സ്ഥലത്ത് കൃഷി ആരംഭിച്ചതായി ഓട്ടോമോട്ടീവ് ടയര്‍ മാനുഫാക്ചറേഴ്‌സ് അസോസിയേഷന്‍ കഴിഞ്ഞ ദിവസം അറിയിച്ചിരുന്നു. രണ്ടുലക്ഷം ഹെക്ടര്‍ സ്ഥലത്ത് കൃഷി ആരംഭിക്കുമെന്നും ഇതില്‍ കേരളത്തെ പരിഗണിച്ചിട്ടില്ലെന്നും ചെയര്‍മാന്‍ അര്‍ണബ് ബാനര്‍ജി വ്യക്തമാക്കിയിരുന്നു.
റബര്‍ ഉത്പാദനത്തില്‍ ഒന്നാമത് നില്‍ക്കുന്ന കേരളത്തെ ഒഴിവാക്കുന്നത് അനുവദിക്കില്ല. ഇതിനായി കേന്ദ്രമന്ത്രിതലത്തില്‍ ഇടപെടും. പുതുതായി റബര്‍ കൃഷി ആരംഭിക്കാനാണ് പദ്ധതി ലക്ഷ്യമിടുന്നതെന്നത് ശരിയല്ല. ആഭ്യന്തര റബര്‍ ലഭ്യത വര്‍ധിപ്പിക്കലാണ് ‘ആത്മ’ ലക്ഷ്യമിടുന്നത്.
ആത്മയുടെ നിലപാട് അനുസരിച്ച് കേരളത്തില്‍െ കൃഷി ആരംഭിക്കാന്‍ ഇനി ഒരിഞ്ച് സ്ഥലം പോലും ബാക്കിയില്ല. എന്നാല്‍ കേരളത്തില്‍ തോട്ടങ്ങള്‍ പാഴായി കിടക്കുകയാണ്. ആവര്‍ത്തന കൃഷിക്കായി ഈ തോട്ടങ്ങള്‍ ഉപയോഗിക്കാതെ മറ്റു വിളകളിലേക്ക് തിരിയുകയാണ് കര്‍ഷകര്‍.
ഈ സാഹചര്യം പ്രയോജനപ്പെടുത്തി കേരളത്തിലെ തോട്ടങ്ങളില്‍ റബര്‍ ആവര്‍ത്തന കൃഷി വ്യാപിപ്പിക്കുന്നതിനും അതുവഴി റബര്‍ ഉല്‍പാദനം വര്‍ധിപ്പിക്കാനുമാണ് ആത്മ മുന്‍കൈ എടുക്കേണ്ടതെന്നും ഹരി പറഞ്ഞു.
പ്രതികരിക്കാൻ ഇവിടെ എഴുതുക: