മലപ്പുറം: മുസ്ലിം ലീഗിലെ പ്രബല നേതാക്കളെ തഴഞ്ഞ് അഡ്വ. ഹാരിസ് ബീരാന് രാജ്യസഭാ ടിക്കറ്റ് നൽകിയത് പേമെൻ്റ് സീറ്റാണെന്ന് ആക്ഷേപം. ലീഗിലെ കുഞ്ഞാലിക്കുട്ടി പക്ഷത്തിന്റെ ആരോപണമുന ലീഗ് അധ്യക്ഷൻ പാണക്കാട് സാദിഖലി ശിഹാബ് തങ്ങൾക്ക് നേരെയാണ്. പാണക്കാട് തങ്ങളോട് എതിർ വായില്ലെന്ന കീഴ് വഴക്കം കാരണം പരസ്യ വിമർശനങ്ങൾ ഉയരുന്നില്ലെന്നു മാത്രം.
രാജ്യസഭാ സീറ്റിന് അർഹരായ പ്രവർത്തന പാരമ്പര്യമുള്ള നേതാക്കളെ വെട്ടിനിരത്തിയാണ് ശിഹാബ് തങ്ങൾ അഡ്വ. ഹാരിസ് ബീരാനു വേണ്ടി കടുംപിടിത്തം കാട്ടിയത്.
ലീഗിനു വേണ്ടി നടത്തിയ കേസുകളിലും ഹാരിസ് ബീരാൻ ലക്ഷങ്ങൾ ചോദിച്ചു വാങ്ങിയിരുന്നു. ലീഗ് നേതൃത്വം ശുപാർശ ചെയ്ത കേസുകളിലും പ്രതിഫലം കുറച്ചിട്ടില്ല.
ലീഗിന്റെ സാംസ്കാരിക വിഭാഗമായ കെഎംസിസി ദൽഹി ഘടകത്തിന്റെ പ്രസിഡൻ്റ് സ്ഥാനം ഹാരിസ് ബീരാൻ സംഘടിപ്പിച്ചപ്പോൾ തന്നെ രാജ്യസഭാ ടിക്കറ്റാണ് ലക്ഷ്യമെന്ന് ലീഗിലെ എതിർവിഭാഗം കണക്കുകൂട്ടിയിരുന്നു.
പാലാരിവട്ടം അഴിമതി കേസിൽ പ്രതിയായ ലീഗ് മുൻമന്ത്രി ഇബ്രാഹിം കുഞ്ഞിന്റെ സഹോദര പുത്രനാണ് ഹാരിസ് ബീരാൻ. ലീഗ് സംസ്ഥാന ജനറൽ സെക്രട്ടറി പി.എം എ സലാമിനെ രാജ്യസഭാ സ്ഥാനാർഥിയാക്കാനാണു ലീഗിൽ ഭൂരിഭാഗം നേതാക്കളും ആഗ്രഹിച്ചത്. ഇത്തവണ യുവ നേതാവ് ആകട്ടെയെന്ന ചർച്ചയിൽ യൂത്ത് ലീഗ് ദേശീയ ജനറൽ സെക്രട്ടറി ഫൈസൽ ബാബു, യൂത്ത് ലീഗ് സംസ്ഥാന ജനറൽ സെക്രട്ടറി പി.കെ. ഫിറോസ് എന്നിവരുടെ പേരുകളും ഉയർന്നു വന്നു. എന്നാൽ ലീഗിൽ പാണക്കാട് തങ്ങളുടെ വീറ്റോ അധികാരം പ്രയോഗിച്ചാണ് ഹാരിസ് ബീരാനെ സ്ഥാനാർഥിയാക്കിയത്.
ലീഗിൽ അവസാന വാക്ക് പാണക്കാട് തങ്ങൾക്കാണെങ്കിലും സമവായ തീരുമാനങ്ങളായിരുന്നു കൂടുതലും. ലീഗിൽ കുഞ്ഞാലിക്കുട്ടി – മുനീർ ചേരികളിൽ അഭിപ്രായ ഭിന്നത ഉണ്ടായ ഘട്ടങ്ങളിലാണ് പാണക്കാട് തങ്ങളുടെ അന്തിമ തീരുമാനം വരിക. ഇത്തവണ പി.എം.എ സലാമിനെയോ പി.കെ. ഫിറോസിനെയോ സ്ഥാനാർഥിയാക്കുന്നതിൽ പാർട്ടിക്കുള്ളിൽ ഭിന്നതകൾ ഇല്ലായിരിക്കെയാണ് പാണക്കാട് തങ്ങൾ ഏകപക്ഷീയമായി സ്വന്തം തീരുമാനം അടിച്ചേൽപിച്ചത്. ലീഗിനുള്ളിൽ സംസ്ഥാന അധ്യക്ഷന്റെ തീരുമാനത്തിനെതിരെ അസ്വസ്ഥത പടരുന്നതും ഇതാദ്യമായാണ്.
