പാലക്കാട് : സേലം – കൊച്ചി ദേശീയപാതയില് മലയാളി യാത്രക്കാരെ ആക്രമിച്ച പതിനഞ്ചംഗ മുഖംമൂടി സംഘത്തിലെ സൈനികന് അടക്കം നാല് പേര് പാലക്കാട്ട് പിടിയില്. ചിറ്റൂര് സ്വദേശികളായ ശിവദാസ് (29), രമേഷ് ബാബു (27), കുന്നത്തുപാളയം സ്വദേശിയും മദ്രാസ് റെജിമെന്റിലെ സൈനികനുമായ വിഷ്ണു (28), മല്ലപ്പള്ളി അജയ് കുമാര് (24) എന്നിവരെയാണ് മധുക്കര പൊലീസ് അറസ്റ്റുചെയ്തത്. പ്രതികളെ റിമാന്ഡ് ചെയ്തു.
വെള്ളിയാഴ്ച പുലര്ച്ച കോയമ്പത്തൂര് മധുക്കര സ്റ്റേഷന് പരിധിയിലെ എല്ആന്ടി ബൈപ്പാസിലായിരുന്നു ആക്രമണം. എറണാകുളം പട്ടിമറ്റം സ്വദേശികളായ അസ്ലം സിദ്ദിഖും ചാള്സ് റജിയും മറ്റുരണ്ടുപേരുമാണ് ആക്രമിക്കപ്പെട്ടത്. മൂന്ന് കാറുകളിലെത്തിയ പതിനഞ്ചംഗ മുഖംമൂടി സംഘമാണ് ഇവര് സഞ്ചരിച്ചിരുന്ന കാര് അടിച്ചുതകര്ത്തത്.
കുഴല്പ്പണവുമായി വരുന്നവരെന്ന് തെറ്റിദ്ധരിച്ചാണ് ആക്രമണമെന്നാണ് പ്രാഥമിക നിഗമനം. രണ്ട് കാറുകളും പിടിച്ചെടുത്തിട്ടുണ്ട്.
