ആലപ്പുഴ : സിബിസി വാര്യര് സ്മൃതി പരിപാടിയില് നിന്നും ഇറങ്ങി പോയതല്ലെന്നും 12 മണിക്ക് അടുത്ത പരിപാടി ഉണ്ടായിരുന്നുവെന്നും മുതിര്ന്ന സി പി എം നേതാവ് ജി സുധാകരന്. പത്ത് മണിക്ക് നിശ്ചയിച്ച പരിപാടിക്ക് പത്തേമുക്കാലായിട്ടും അധ്യക്ഷനും വന്നില്ല, മന്ത്രിയും വന്നില്ല. അപ്പോള് തന്നെ സെക്രട്ടറിയോട് കാര്യം പറഞ്ഞെന്നും ജി സുധാകരന് വെളിപ്പെടുത്തി.
പരിപാടിയില് നിന്ന് സുധാകരന് ഇറങ്ങിപ്പോയെന്ന് വാര്ത്ത പ്രചരിച്ച സാഹചര്യത്തിലാണ് വിശദീകരണം. മന്ത്രി സജി ചെറിയാന് വന്നില്ലല്ലോ, അതെന്താണ് വാര്ത്തയാക്കാത്തതെന്നും ചോദിച്ച ജി സുധാകരന് മാധ്യമപ്രവര്ത്തകര്ക്ക് ഭ്രാന്താണെന്നും പറഞ്ഞു.
ശനിയാഴ്ച രാവിലെ ആലപ്പുഴയില് നടക്കാനിരുന്ന പരിപാടിയിലാണ് സംഭവം. പുരസ്കാര സമര്പ്പണത്തിനായാണ് ജി സുധാകരന് എത്തിയത്. പത്ത് മണിക്ക് പരിപാടി തുടങ്ങുമെന്ന് അറിയിച്ചതനുസരിച്ച് സുധാകരന് കൃത്യ സമയത്ത് തന്നെ വേദിയിലെത്തി. എന്നാല്, ഏറെ നേരം കാത്തിരുന്നിട്ടും മറ്റു അതിഥികള് എത്തിയില്ല.
11 മണിയോടെയാണ് പരിപാടി ആരംഭിച്ചെങ്കിലും പരിപാടി ആരംഭിക്കാന് വൈകിയതിനെ തുടര്ന്ന് സംഘാടകരോട് ക്ഷോഭിച്ച് ജി സുധാകരന് പുറത്തേക്ക് പോയി. മന്ത്രി സജി ചെറിയാന്, സിപിഎം സംസ്ഥാന കമ്മിറ്റി അംഗം സിബി.ചന്ദ്രബാബു, കേന്ദ്ര കമ്മിറ്റിയംഗം സി എസ് സുജാത എന്നിവര് പങ്കെടുക്കുന്ന പരിപാടിയില് നിന്നാണ് സുധാകരന് ഇറങ്ങിപ്പോയത്.
