ന്യൂദല്ഹി: രാഹുല് ഗാന്ധി ഏത് മണ്ഡലത്തില് തുടരുമെന്ന കാര്യത്തില് തീരുമാനമായില്ല. വയനാടോ റായ്ബറേലിയോ എന്ന കാര്യത്തില് അന്തിമതീരുമാനം കോണ്ഗ്രസ് നേതൃത്വം രാഹുല്ഗാന്ധിക്ക് തന്നെ വിട്ടിരിക്കുകയാണ്. രാഹുല് ഇന്ന് തീരുമാനം അറിയിക്കുമെന്ന സൂചനയാണ് അവസാനം ലഭിക്കുന്നത്.
ദേശീയ തലത്തില് ശ്രദ്ധയൂന്നുന്നതിന് രാഹുല് റായ്ബറേലിയില് തുടരണമെന്ന അഭിപ്രായമാണ് പാര്ട്ടിക്കകത്ത് ഉയരുന്നത്. രാഹുല് വയനാട് വിടുമെന്ന രീതിയിലുള്ള പ്രതികരണം കെപിസിസി പ്രസിഡന്റ് കെ. സുധാകരന് ഉള്പ്പെടെയുള്ളവരുടെ ഭാഗത്ത് നിന്നുണ്ടാകുകയും ചെയ്തിട്ടുണ്ട്. രാഹുല് രണ്ട് മണ്ഡലങ്ങളില് നിന്നും വിജയിച്ചാല് വയനാടിനെ കൈവിടുമെന്ന് നേരത്തെ തന്നെ ബിജെപി ചൂണ്ടിക്കാണിച്ചിരുന്നു.
ഇക്കാരണത്താല് റായ്ബറേലിയില് മത്സരിക്കുന്ന തീരുമാനം പോലും വൈകിയാണ് പ്രഖ്യാപിക്കപ്പെട്ടത്. മണ്ഡലം വിടുന്നത് രാഹുല് വയനാട്ടിലെ ജനങ്ങളോട് കാണിക്കുന്ന വഞ്ചനയാണെന്ന് ബിജെപി ഇതിനകം ആരോപിച്ചിട്ടുണ്ട്. രാഹുല് പോയാലും വയനാട്ടില് പ്രിയങ്ക എത്തുമെന്ന രീതിയിലുള്ള പ്രചരണവും തുടങ്ങിക്കഴിഞ്ഞു.
