കൊച്ചി: മാട്രിമോണി സൈറ്റ് വഴി ആലോചിച്ചിട്ടും വിവാഹം നടക്കാതെ വന്ന യുവാവിന് നഷ്ടപരിഹാരം നല്കാന് വിധിച്ച് ഉപഭോക്തൃ തര്ക്ക പരിഹാര കമ്മിഷന്. എറണാകുളം ജില്ലാ ഉപഭോക്തൃ തര്ക്ക പരിഹാര കമ്മീഷനാണ് ഉത്തരവിട്ടത്. ചേര്ത്തല സ്വദേശിയായ യുവാവ് എറണാകുളത്തെ സ്വകാര്യ സ്ഥാപനത്തിനെതിരെ നല്കിയ പരാതിയിലാണ് നടപടി.
2018 ഡിസംബറിലാണ് സ്ഥാപനത്തിന്റെ വെബ്സൈറ്റില് യുവാവ് സൗജന്യമായി പ്രൊഫൈല് രജിസ്റ്റര് ചെയ്തത്. ഇതിന് ശേഷം വെബ്സൈറ്റിന്റെ ഓഫീസില് നിന്നും പലതവണ ബന്ധപ്പെടുകയും തുക നല്കിയാല് മാത്രമേ പങ്കാളിയുടെ വിവരങ്ങള് നല്കുകയുള്ളൂ എന്നും വിശദമാക്കി. പണം നല്കി രജിസ്റ്റര് ചെയ്താല് വിവാഹം നടത്തുന്നതിന് വേണ്ടി എല്ലാ സഹായവും ചെയ്തു നല്കാമെന്നും ഇവര് വാഗ്ദാനവും നല്കി. ഇതിനായി 4100 രൂപ ഫീസായും ഈടാക്കി.
എന്നാല് പണം നല്കിയതിന് ശേഷം ഫോണ് കോളുകള്ക്ക് മറുപടിയില്ലാതെയായി. പിന്നാലെ ഓഫീസില് പോയി അന്വേഷിച്ചിട്ടും പ്രതികരണം ലഭിക്കാത്ത സാഹചര്യത്തിലാണ് യുവാവ് ജില്ലാ ഉപഭോക്തൃ തര്ക്ക പരിഹാര കമ്മീഷനെ സമീപിച്ചത്. 2019 ജനുവരി മുതല് 3 മാസത്തേക്ക് 4,100 രൂപയ്ക്ക് ക്ലാസിക് പാക്കേജില് കീഴില് പരാതിക്കാരന് രജിസ്റ്റര് ചെയ്തിട്ടുണ്ടെന്നും, രണ്ടായിരത്തിലെ ഐടി ആക്ട് പ്രകാരം രജിസ്റ്റര് ചെയ്ത ഇടനിലക്കാര് മാത്രമാണ് തങ്ങളെന്നും സേവന കാലയളവില് വിവാഹം ഉറപ്പു നല്കിയിരുന്നില്ലെന്നുമാണ് കോടതിയില് മാട്രിമോണി സ്ഥാപനം വ്യക്തമാക്കിയത്.
വിവാഹം നടക്കുമെന്ന തരത്തില് ആകര്ഷകമായ പരസ്യങ്ങള് നല്കി ഉപഭോക്താക്കളെ ആകര്ഷിച്ച ശേഷം ഉത്തരവാദിത്വത്തില് നിന്നും ഒഴിവാക്കുന്ന നടപടി അധാര്മിക വ്യാപാര രീതിയും സേവനത്തിലെ ന്യൂനതയും ആണെന്ന് കോടതി വിലയിരുത്തി.
രജിസ്ട്രേഷന് ഇനത്തില് ചിലവായ 4100 രൂപ തിരികെ നല്കുന്നതിനും കൂടാതെ 28000 രൂപ നഷ്ടപരിഹാരമായും എതിര്കക്ഷി പരാതിക്കാരന് നല്കുന്നതിന് ഡി ബി ബിനു അധ്യക്ഷനും വി രാമചന്ദ്രന്, ടി എന് ശ്രീവിദ്യ എന്നിവര് അംഗങ്ങളുമായ ബഞ്ച് എതിര്കക്ഷികള്ക്ക് ഉത്തരവിടുകയായിരുന്നു.
