കൊല്ലം: എടിഎമ്മിൽ നിന്ന് പണം ലഭിക്കാഞ്ഞതിന് പിന്നാലെ കൊല്ലം സ്വദേശിനിയ്ക്ക് നഷ്ടപരിഹാരം നൽകാൻ ഉത്തരവ്. കൊല്ലം വനിതാ സെല്ലിലെ അസി.സബ് ഇൻസ്പെക്ടർ വി സുപ്രഭയ്ക്കാണ് നഷ്ടപരിഹാരം നൽകാൻ കോടതി ഉത്തരവിട്ടത്. 2019 ഏപ്രിൽ 19-നാണ് കേസിന് ആസ്പദമായ സംഭവം.
ഇരവിപുരത്തെ എടിഎമ്മിൽ നിന്ന് 20,000 രൂപ പിൻവലിക്കാൻ ശ്രമിക്കവെ ലഭിച്ചത് 10,000 രൂപ മാത്രമായിരുന്നു. എന്നാൽ പരാതിക്കാരിയുടെ ബാങ്ക് അക്കൗണ്ടിൽ നിന്നും 20,000 രൂപ കുറയുകയും ചെയ്തു. തുടർന്ന് ബാങ്കിന് പരാതി നൽകിയെങ്കിലും ഇത് തള്ളിയതിന് പിന്നാലെ തിരുവനന്തപുരം ബാങ്കിംഗ് ഓംബുഡ്സ്മാന് പരാതി നൽകി.
പരാതി പരിശോധിച്ച കമ്മീഷൻ 40,000 രൂപ നൽകാൻ ഉത്തരവിടുകയായിരുന്നു. എടിഎമ്മിൽ നിന്ന് ലഭിക്കാത്ത 10,000 രൂപയും നഷ്ടപരിഹാര ചെലവും ഉൾപ്പെടെ 40,000 രൂപ ഉപയോക്താവിന് നൽകാനാണ് കൊല്ലം ഉപഭോക്തൃ തർക്ക പരിഹാര കമ്മീഷന്റെ ഉത്തരവ്.
